'റോക്കി ബായി'യെ കണ്ട് ഒരു പാക്കറ്റ് സിഗരറ്റ് വലിച്ചുതീർത്തു, 15കാരൻ ആശുപത്രിയിൽ

കുട്ടിയുടെ നെഞ്ചിന്റെ എക്സ്റേയിൽ സംശയാസ്പദമായ ഒന്നും കണ്ടെത്താനായില്ലെന്നും പിന്നീടാണ് പുകവലി മൂലമാണ് പ്രശ്നമുണ്ടായതെന്ന് മനസിലാക്കിയതെന്നും ശ്വാസകോശരോഗ വിദ​ഗ്ധനായ ഡോ. രോഹിത് റെഡ്ഡി പറഞ്ഞു. കുട്ടിയുടെ വലതു കൈയുടെ നടുവിരലിൽ പൊള്ളലേറ്റ പാടുണ്ടായിരുന്നു. ഇതിനെപ്പറ്റി ചോദിച്ചപ്പോഴാണ് കുട്ടി പുകവലിച്ച വിവരം വെളിപ്പെടുത്തിയത്. സമൂഹത്തിൽ വലിയ സ്വാധീനം ചെലുത്തുന്ന കലയാണ് സിനിമയെന്നും സിഗരറ്റ് വലിയെയും മദ്യ ഉപയോ​ഗത്തെയും മഹത്വവൽക്കരിക്കരുതെന്നും അദ്ദേഹം ആവശ്യപ്പെട്ടു.

ആയിരത്തി മുന്നൂറ് കോടി രൂപ ലോകമാകെ കളക്ഷൻ നേടി മൂന്നാഴ്‌ച കഴിഞ്ഞും പ്രദർശനം തുടരുകയാണ് റോക്കി ഭായിയായി യാഷ് തകർത്തഭിനയിച്ച കെജിഎഫ് 2. റോക്കിയെ അനുകരിച്ച് സി​ഗരറ്റ് വലിക്കാൻ നോക്കിയതാണ് കുട്ടിയുടെ ആരോ​ഗ്യനില മോശമാവാൻ കാരണം.

രണ്ട് ദിവസത്തിനിടെ പയ്യൻ മൂന്ന് തവണ കെജിഎഫ് 2 കണ്ടു. ഇതിനിടെ നിരന്തരം സിഗരറ്റ് വലിച്ച് തൊണ്ടവേദനയും ചുമയും രൂക്ഷമാവുകയായിരുന്നു. ശനിയാഴ്‌ചയോടെ കുട്ടിയെ ആശുപത്രിയിൽ നിന്നും ഡിസ്‌ചാർജ് ചെയ്‌തു. തുടർന്ന് കുട്ടിയ്‌ക്ക് കൗൺസിലിംഗും നൽകിയാണ് മടക്കിയയച്ചത്.