സൗന്ദര്യമില്ലെന്ന് പറഞ്ഞ് കളിയാക്കലും അധിക്ഷേപവും!, സ്ത്രീധനമായി കൂടുതൽ സ്വർണ്ണവും പണവും ആവശ്യപ്പെട്ടു, 28കാരിയുടെ പരാതിയിൽ ഭർത്താവിനും ഭർതൃവീട്ടുകാർക്കുമെതിരെ കേസ്

പയ്യന്നൂര്‍ : സൗന്ദര്യമില്ലെന്ന് പറഞ്ഞ് ആക്ഷേപിക്കുകയും കൂടുതല്‍ സ്വര്‍ണവും പണവും ആവശ്യപ്പെടുകയും ചെയ്തു എന്ന യുവതിയുടെ പരാതിയിൽ ഭര്‍ത്താവിന്റെയും ഭര്‍തൃവീട്ടുകാരുടെയും പേരിൽ കേസ്. മാനസികവും ശാരീരികവുമായി പീഡിപ്പിക്കുന്നുവെന്ന യുവതിയുടെ പരാതിയില്‍ ആണ് പോലീസ് കേസ് രജിസ്റ്റർ ചെയ്തത്.കണ്ണൂർ പയ്യന്നൂരിലെ 28 വ‍യസുകാരിയായ പെണ്‍കുട്ടിക്കാണ് ഭർതൃവീട്ടില്‍ പീഡനം നേരിടേണ്ടി വന്നത് എന്നാണ് പുറത്തു വരുന്ന വിവരം. ഭർത്താവ് ഷൊർണൂർ കൊളപ്പുള്ളി സ്വദേശി ദീപക്, ദീപക്കിന്‍റെ മാതാപിതാക്കളായ ഇന്ദിര, സതീശൻ, ബന്ധുക്കളായ ദിവ്യ, രമ്യ എന്നിവർക്കെതിരെയാണ് പോലീസ് കേസെടുത്തിരിക്കുന്നത്.അതേസമയം വീട്ടുകാർ ആലോചിച്ച്‌ ഉറപ്പിച്ച്‌ നടന്ന വിവാഹത്തിന് പെണ്‍കുട്ടിയുടെ വീട്ടുകാർ 65 പവൻ നല്‍കിയിരുന്നു. 

പിന്നീട് ഭർതൃഗൃഹത്തില്‍ താമസിച്ചു തുടങ്ങിയതോടെ ഭർത്താവും ബന്ധുക്കളും കൂടുതല്‍ സ്വർണവും 10 ലക്ഷം രൂപയും വേണമെന്ന് ആവശ്യപ്പെടുകയായിരുന്നു എന്നാണ് പുറത്തു വരുന്ന വിവരം. എന്നാൽ ഇത് ലഭിക്കാതെ വന്നതോടെ സൗന്ദര്യമില്ലെന്ന് പറഞ്ഞ് പെൺകുട്ടിയെ ആക്ഷേപിച്ചെന്നും മാനസികമായും ശാരീരികമായും പീഡിപ്പിച്ചുവെന്നും യുവതിയുടെ പരാതി വ്യക്തമാക്കുന്നു. ഭര്‍ത്താവ് പലതരത്തിലുള്ള ലൈംഗീക വൈകൃതങ്ങള്‍ക്ക് വിധേയമാക്കുന്നതായും പരാതിയിലുണ്ട്.