വെള്ളപ്പാച്ചിലില്‍ വൈദികന്‍ സഞ്ചരിച്ച കാര്‍ ഒഴുക്കില്‍ പെട്ടു...!, ഒരു വിധത്തില്‍ ഡോര്‍ തുറന്ന് വൈദികന്‍ അത്ഭുതകരമായി നീന്തി രക്ഷപ്പെട്ടു, കാര്‍ കാണാതായി

കോതമംഗലം : കനത്ത മഴയെ തുടര്‍ന്ന് മുള്ളിരിങ്ങാട് വെള്ളക്കയത്ത് ഉണ്ടായ വെള്ളപ്പാച്ചില്‍ കാര്‍ ഒഴുക്കില്‍പ്പെട്ടു. കാറില്‍ സഞ്ചരിച്ചിരുന്ന വൈദികന്‍ നീന്തി രക്ഷപെട്ടു.

കഴിഞ്ഞ ദിവസം വൈകിട്ട് 7 മണിയോടെയാണ് സംഭവം. മുള്ളിരിങ്ങാട് ലൂര്‍ദ്മാതാ പള്ളി വികാരി ഫാ.ജേക്കബ്ബ് വട്ടപ്പിള്ളിയാണ് ഒഴുക്കില്‍പ്പെട്ടത്. കാര്‍ ഒഴുക്കില്‍പ്പെട്ടെന്നും ഒരു വിധത്തില്‍ ഡോര്‍ തുറന്ന് വൈദികന്‍ നീന്തി രക്ഷപെടുകയായിരുന്നു എന്നുമാണ് ഏറ്റവും ഒടുവില്‍ ലഭി്ക്കുന്ന വിവരം.

ഇടവകയിലെ ഭവന സന്ദര്‍ശനം കഴിഞ്ഞ് മടങ്ങിവരവെയാണ് വൈദികന്‍ കാര്‍ സഹിതം ഒഴുക്കില്‍പ്പെട്ടത്. ഇദ്ദേഹം രക്ഷപെട്ട് പ്രദേശത്തെ ഒരു വീട്ടില്‍ അഭയം തേടിയിരിക്കുകയാണ്. ഇവിടെ നിന്നും പുറത്തുകടക്കാനാവാത്ത അവസ്ഥയിലാണ് വൈദികന്‍. കാര്‍ ഒഴുക്കില്‍പ്പെട്ട് കാണാതായി എന്നാണ് ലഭ്യമായ വിവരം.