പിന്നോട്ടെടുത്ത കാർ ദേഹത്തേക്ക് കയറി നാലു വയസുകാരി മരിച്ചു; വീടിന്‍റെ മുറ്റത്ത് നിന്നിരുന്ന ബന്ധുവായ സ്ത്രീക്ക് ഗുരുതര പരിക്ക്

മലപ്പുറം : മലപ്പുറം എടപ്പാളിൽ പിന്നോട്ടെടുത്ത കാർ ദേഹത്തേക്ക് കയറി നാലു വയസുകാരി മരിച്ചു. എടപ്പാൾ മഠത്തിൽ വീട്ടിൽ ജാബിറിന്‍റെ മകൾ അംറുബിൻദ് ജാബിർ ആണ് മരിച്ചത്. വീട്ടിൽ നിർത്തിയിട്ടിരുന്ന കാർ പിറകോട്ട് എടുക്കുന്നതിനിടെ അബദ്ധത്തിൽ കുഞ്ഞിന്‍റെ ദേഹത്തേക്ക് ഇടിച്ചുകയറുകയായിരുന്നു. 

വീടിന്‍റെ മുറ്റത്ത് നിന്നിരുന്ന ബന്ധുവായ സ്ത്രീക്കും കാറിലുണ്ടായിരുന്ന രണ്ടു സ്ത്രീകള്‍ക്കും അപകടത്തിൽ പരിക്കേറ്റിട്ടുണ്ട്. ഇതിൽ മുറ്റത്ത് നിന്നിരുന്ന സ്ത്രീയുടെ പരിക്ക് ഗുരുതരമാണ്. ഇവരെ കോട്ടയ്ക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. 

ഇന്നലെ രാത്രിയോടെയാണ് അപകടം നടന്നത്. ഓട്ടോമാറ്റിക് കാറാണ് അപകടത്തിൽപ്പെട്ടത്. രണ്ട് സ്ത്രീകളാണ് കാറിൽ ഉണ്ടായിരുന്നത്. അപകടം നടന്ന ഉടനെ കുഞ്ഞിനെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.