എറണാകുളം : സ്വകാര്യ ആശുപത്രിയിലെ ഐ.സി.യുവില്‍ ഉപേക്ഷിക്കപ്പെട്ട് 950 ഗ്രാം തൂക്കത്തില്‍ ജനിച്ച ജാര്‍ഖണ്ഡ് സ്വദേശികളായ ദമ്പതികളുടെ മൂന്ന് ആഴ്ച പ്രായമുള്ള പെണ്‍കുഞ്ഞ് ഇന്ന് പൂര്‍ണ ആരോഗ്യവതിയായി. ഇപ്പോള്‍ രണ്ടര കിലോ തൂക്കം നേടിയ കുട്ടിയെ ശിശുക്ഷേമ സമിതിക്ക് കൈമാറുന്നതിനുള്ള നടപടികള്‍ പൂര്‍ത്തിയായിരിക്കുകയാണ്.
കോട്ടയത്തെ ഫിഷ് ഫാമില്‍ ജോലി ചെയ്തിരുന്ന ദമ്പതികള്‍ നാട്ടിലേക്ക് മടങ്ങുന്നതിനിടയില്‍ ട്രെയിനില്‍ ഭാര്യയ്ക്ക് അസ്വസ്ഥതയായതിനെത്തുടര്‍ന്ന് സമീപ ആശുപത്രിയില്‍ പെണ്‍കുഞ്ഞ് ജനിച്ചു. ശരീരഭാരം കുറഞ്ഞതിനാല്‍ വിദഗ്ധപരിചരണത്തിനായി കുട്ടിയെ സ്വകാര്യ ആശുപത്രിയിലെ എന്‍ഐസിയുവിലേക്കു മാറ്റിയെങ്കിലും പിന്നീട് ദമ്പതികളെ കാണാതായി. ഈ വിവരം ശ്രദ്ധയില്‍പ്പെട്ടതിനെ തുടര്‍ന്ന് ആരോഗ്യ വകുപ്പ് മന്ത്രി വീണാ ജോർജ്, കുഞ്ഞിന്റെ സംരക്ഷണവും ചികിത്സയും ഏറ്റെടുക്കാൻ നിര്‍ദേശം നല്‍കി. ആശുപത്രി സൂപ്രണ്ട് ഡോ. ഷഹിര്‍ഷായുടെ അഭ്യര്‍ഥന പ്രകാരമാണ് കുട്ടിക്ക് ‘നിധി’ എന്ന പേര് നല്‍കിയത്. ഓരോ കുഞ്ഞും അമൂല്യമായ സമ്പത്താണെന്ന് വച്ചാണ് ഈ പേര് തിരഞ്ഞെടുക്കപ്പെട്ടത്.
എറണാകുളം ജനറല്‍ ആശുപത്രിയിലെ സ്പെഷ്യല്‍ ന്യൂബോണ്‍ കെയര്‍ യൂണിറ്റില്‍ ചികിത്സയിലായിരുന്ന കുഞ്ഞിന് നിലവില്‍ ആവശ്യമായത് മള്‍ട്ടിവിറ്റാമിനുകളും അയണ്‍ ഡ്രോപ്സുമാത്രമാണ്. ആദ്യ ഘട്ടത്തില്‍ ഓക്‌സിജന്‍ പിന്തുണയോടെയും, രക്തം നല്‍കിയതോടെയും കൂടി ചികിത്സ നടത്തിയിരുന്നു. മുലപ്പാല്‍ ആശുപത്രിയിലെ മില്‍ക്ക് ബാങ്കില്‍ നിന്നാണ് നല്‍കിയത്. കുഞ്ഞിന്റെ ചികിത്സയും പരിപാലനവും മാനസിക ശാരീരിക ദൗര്‍ബല്യങ്ങളില്ലാതെ വിജയകരമായി പൂര്‍ത്തിയാക്കിയതില്‍ ആശുപത്രി ടീം അംഗങ്ങളെ മന്ത്രി അഭിനന്ദിച്ചു. ഡോ. വിനീതയുടെ നേതൃത്വത്തിലുള്ള പീഡിയാട്രിക് വിഭാഗം, സ്പെഷ്യല്‍ ഓഫീസര്‍ ഡോ. വിജി, നഴ്സുമാര്‍, ശിശുവികസന വകുപ്പ് ഉദ്യോഗസ്ഥര്‍ എന്നിവര്‍ ഒത്തിണങ്ങി പ്രവര്‍ത്തിച്ചാണ് കുഞ്ഞിന്റെ ജീവിതം രക്ഷിക്കപ്പെട്ടത്.
ആശുപത്രിയില്‍ ചികിത്സ കഴിഞ്ഞ നാളെയാണ് കുഞ്ഞിനെ ഔദ്യോഗികമായി ജില്ലാ ശിശുക്ഷേമ സമിതി ഏറ്റെടുക്കുന്നത്.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
0 تعليقات