വിദ്യയ്ക്കെതിരെ ലുക്ക് ഔട്ട് നോട്ടീസ്!, അറസ്റ്റ് ചെയ്യാത്തതില്‍ പ്രതിഷേധം ശക്തമാക്കി കെ എസ് യു

ഗസ്റ്റ് അധ്യാപിക നിയമനത്തിനായി വ്യാജ സര്‍ട്ടിഫിക്കറ്റ് ചമച്ച കേസില്‍ എസ്.എഫ്.ഐ നേതാവ് കെ.വിദ്യയെ അറസ്റ്റ് ചെയ്യാത്തതില്‍ പ്രതിഷേധം ശക്തമാക്കി കെ എസ് യു. വിദ്യയെ സംരക്ഷിക്കുന്ന പോലീസ് നടപടിയില്‍ പ്രതിഷേധിച്ച്  കെ.എസ്.യു കണ്ണൂര്‍ ജില്ലാ കമ്മിറ്റിയുടെ നേതൃത്വത്തില്‍ കളക്ട്രേറ്റ് മതിലില്‍ ലുക്ക് ഔട്ട് നോട്ടീസ് പതിപ്പിച്ചു.

ഡി.സി.സി ഓഫീസില്‍ നിന്നും കണ്ണൂര്‍ കളക്ട്രേറ്റ് കവാടത്തിലേക്ക് പ്രകടനമായെത്തിയ കെ.എസ്.യു പ്രവര്‍ത്തകരെ ടൗണ്‍ എസ്.ഐ യുടെ നേതൃത്വത്തിലുള്ള പോലീസ് സംഘം തടഞ്ഞു. തുടര്‍ന്ന് മുദ്രാവാക്യം വിളിച്ച് പ്രതിഷേധിക്കുകയും വിദ്യയെ അറസ്റ്റ് ചെയ്യുക, പോലീസിന്റെ ഒത്തുകളി അവസാനിപ്പിക്കുക എന്നീ ആവശ്യങ്ങള്‍ ഉന്നയിച്ച് ജില്ലാ പ്രസിഡന്റ് എം.സി അതുലിന്റെ നേതൃത്വത്തില്‍ മതിലില്‍ വിദ്യയുടെ ലുക്ക് ഔട്ട് നോട്ടീസ് പതിപ്പിക്കുകയായിരുന്നു.

കെ.എസ്.യു സംസ്ഥാന എക്‌സിക്യൂട്ടീവ് കമ്മിറ്റി അംഗങ്ങളായ അന്‍സില്‍ വാഴപ്പള്ളില്‍,ആകാശ് ഭാസ്‌കരന്‍,ആഷിത്ത് അശോകന്‍,മുഹമ്മദ് റാഹിബ്,ചാള്‍സ് സണ്ണി,റിസ്വാന്‍ സി.എച്ച്,പ്രകീര്‍ത്ത് മുണ്ടേരി,കാവ്യ കെ,തീര്‍ത്ത കട്ടേരി,ഹരികൃഷ്ണന്‍ പൊറോറ,അതുല്‍ പി,ഹരീഷ്മ എം,അജ്‌സാം മയ്യില്‍ തുടങ്ങിയവരും പ്രതിഷേധത്തിന് നേതൃത്വം നല്‍കി.