മദ്യപിച്ച് കിടക്കുകയാണെന്ന് കരുതി പോലീസും നാട്ടുകാരും അവഗണിച്ചു!, റോഡരികിൽ കിടന്ന് ഹൃദ്രോഗിയായ യുവാവിന് ദാരുണാന്ത്യം

എറണാകുളം : റോഡരികിൽ അവശ നിലയിൽ കിടന്ന ഹൃദ്രോഗിയായ യുവാവിന് ദാരുണാന്ത്യം. നെട്ടൂർ പുതിയാമഠം റോഡ് അടിമത്തറയിൽ പരേതനായ കണ്ണന്റെയും മണിയുടെയും മകനും മത്സ്യത്തൊഴിലാളിയുമായ സുരേഷാണ് മരിച്ചത്. മരട് പോലീസ് സ്റ്റേഷന് സമീപം ഇന്നലെ ഉച്ചയോടെയാണ് സംഭവം ഉണ്ടായത്. ഹൃദ്രോഗത്തെ തുടർന്ന് അവശനിലയിലായ ഇയാൾ പോലീസ് സ്റ്റേഷന്റെ മതിലിന് പുറത്ത് കുഴഞ്ഞുവീണു. എന്നാൽ ഇയാൾ മദ്യപിച്ച് കിടക്കുകയാണെന്ന് കരുതി നാട്ടുകാരും പോലീസും തിരിഞ്ഞുനോക്കിയില്ല. പിന്നീട് ഇയാളെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.