മുതിര്ന്ന കോണ്ഗ്രസ് നേതാവ് എ കെ ആന്റണിയുടെ മകന് അനില് ആന്റണിയെ ബിജെപി ദേശീയ സെക്രട്ടറിയായി നിയമിച്ചു.13 ദേശീയ സെക്രട്ടറിമാരില് ഒരാളായിട്ടാണ് അനില് ആന്റണിയെ നിയമിച്ചിരിക്കുന്നത്. പാര്ട്ടിയുടെ പുതിയ കേന്ദ്രഭാരവാഹികളുടെ പട്ടിക ബിജെപി ദേശീയ അധ്യക്ഷന് ജെ പി നഡ്ഡയാണ് പ്രഖ്യാപിച്ചത്. എ പി അബ്ദുള്ളകുട്ടി ദേശീയ ഉപാധ്യക്ഷനായി തുടരും. ദേശീയ ഭാരവാഹി പട്ടികയില് കേരളത്തില്നിന്നു മറ്റാരുമില്ല.
കോണ്ഗ്രസിന്റെ ഡിജിറ്റല് മീഡിയ കണ്വീനറായിരുന്ന അനില് ആന്റണി ഏപ്രിലിലാണ് കോണ്ഗ്രസ് വിട്ട് ബിജെപിയില് ചേര്ന്നത്. അലിഗഢ് മുസ്ലിം സര്വകലാശാല മുന് വൈസ് ചാന്സലര് താരിഖ് മന്സൂറിറും പുതിയ ഉപാധ്യക്ഷന്മാരുടെ പട്ടികയില് ഉള്പ്പെട്ടിട്ടുണ്ട്.
13 വൈസ് പ്രസിഡന്റുമാരും 9 ഒമ്പത് ജനറല് സെക്രട്ടറിമാരും അടങ്ങുന്നതാണ് പാര്ട്ടി അധ്യക്ഷന് ജെപി നഡ്ഡ പ്രഖ്യാപിച്ച ബിജെപിയുടെ പുതിയ ഭാരവാഹി പട്ടിക.
മുതിര്ന്ന കോണ്ഗ്രസ് നേതാവ് എ കെ ആന്റണിയുടെ മകനായ അനില് ആന്റണി ഏപ്രിലില് ബിജെപിയില് ചേര്ന്നത് വിവാദങ്ങളുടെ അകമ്പടിയോടെയായിരുന്നു. കെപിസിസി ഡിജിറ്റല് മീഡിയ കണ്വീനറും എഐസിസി സോഷ്യല് മീഡിയ കോഓര്ഡിനേറ്റുമായിരുന്ന അനില് ആന്റണി മോദി അനുകൂല പ്രസ്താവന നടത്തി കോണ്ഗ്രസ് പ്രവര്ത്തകരുടെ അപ്രീതിക്ക് പാത്രമായാണ് പാര്ട്ടി വിട്ടത്. പ്രധാനമന്ത്രി നരേന്ദ്ര മോദിക്കെതിരായ ബിബിസി ഡോക്യുമെന്ററിക്കെതിരെ പ്രതികരിച്ചാണ് കോണ്ഗ്രസുമായി തെറ്റിയത്. തുടര്ന്ന് പദവികളെല്ലാം രാജിവച്ചാണ് ബിജെപിയില് ചേര്ന്നത്.
ഡല്ഹിയിലെ ബിജെപി ആസ്ഥാനത്ത് കേന്ദ്രമന്ത്രി പീയുഷ് ഗോയലില്നിന്നാണ് അനില് ആന്റണി പാര്ട്ടി അംഗത്വം സ്വീകരിച്ചത്. കേന്ദ്രമന്ത്രി വി.മുരളീധരനും ബിജെപി സംസ്ഥാന അധ്യക്ഷന് കെ. സുരേന്ദ്രനും ഒപ്പമുണ്ടായിരുന്നു.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
0 Comments