കേരളത്തിലെ യു.ഡി.എഫ് വിജയം പോലെ ഈ കണക്ക്!, 20 എം.പിമാരില്‍ 18 പേർക്കും കോടികളുടെ സ്വത്ത്, സി.പി.എം നേതാവ് ഉൾപ്പെടെ മറ്റ് രണ്ട് പേർ ലക്ഷപ്രഭുക്കൾ

ലോക്‌സഭാ തിരഞ്ഞെടുപ്പില്‍ കേരളത്തില്‍ നിന്ന് വിജയിച്ച 20 എം.പിമാരില്‍ 18 പേരും കോടീശ്വരന്‍മാര്‍. ഒരു കോടിയിലധികം ആസ്തിയുള്ളവരാണ് ഇവരെല്ലാം. രണ്ട് എം.പിമാരുടെ മാത്രം ആസ്തിയാണ് ഒരു കോടി കടക്കാതിരുന്നത്. വടകരയില്‍ നിന്ന് മത്സരിച്ച ഷാഫി പറമ്പിലിന്റെ ആസ്തി 99.34 ലക്ഷവും. എല്‍.ഡി.എഫിന്റെ ഏക എം.പി സാന്നിധ്യമായ ആലത്തൂർ മണ്ഡലത്തിൽ നിന്നുള്ള മന്ത്രിയും മുൻ സ്‌പീക്കറുമായ കെ.രാധാകൃഷ്ണന്റെ ആസ്തി 40.14 ലക്ഷവുമാണ്.

തിരുവനന്തപുരത്ത് നിന്ന് മത്സരിച്ച ശശി തരൂരും വയാനാടിന്റെ മനസ് കവര്‍ന്ന രാഹുല്‍ ഗാന്ധിയും തൃശൂരിനെ സ്വന്തമാക്കിയ സുരേഷ് ഗോപിയുമാണ് സ്ഥാനാര്‍ത്ഥികളില്‍ ഏറ്റവും വലിയ കോടീശ്വരന്‍മാര്‍.

ശശി തരൂരിന്റെ മൊത്തം ആസ്തി 56.06 കോടിയും രാഹുല്‍ഗാന്ധിയുടേത് 20.39 കോടിയും സുരേഷ് ഗോപിയുടേത് 18.58 കോടി രൂപയുമാണ്. ആറ്റിങ്ങലില്‍ നിന്ന് മത്സരിച്ച് വിജയിച്ച അടൂര്‍ പ്രകാശാണ് 18.09 കോടി രൂപ ആസ്തിയുമായി ഇവര്‍ക്ക് പിന്നിലുള്ളത്. തിരഞ്ഞെടുപ്പുമായി ബന്ധപ്പെട്ട വിവരങ്ങള്‍ ലഭ്യമാക്കുന്ന അസോസിയേഷന്‍ ഓഫ് ഡെമോക്രാറ്റിക് റിഫോംസ് (എ.ഡി.ആര്‍) ആണ് ഈ പട്ടിക പുറത്തുവിട്ടിരിക്കുന്നത്.