ടി.പി വധക്കേസ് പ്രതികളെ വിട്ടയക്കാൻ സർക്കാർ നീക്കം!, അണ്ണൻ സിജിത്ത് ഉൾപ്പെടെയുള്ള മൂന്ന് പ്രതികളെ വിട്ടയയ്ക്കുന്നതിന് ഹൈക്കോടതി വിധി മറികടന്നു കൊണ്ട്, ​ഗുരുതരമായ കോടതിയലക്ഷ്യമാണെന്ന് കെ.കെ.രമ

തിരുവനന്തപുരം : ടി.പി ചന്ദ്രശേഖരൻ വധക്കേസിൽ പ്രതികളില്‍ മൂന്നു പേര്‍ക്ക് ശിക്ഷാ ഇളവ് നൽകി വിട്ടയക്കാന്‍ സർക്കാർ നീക്കം. ടി.കെ രജീഷ്, മുഹമ്മദ് ഷാഫി, അണ്ണൻ സിജിത്ത് എന്നിവരാണ് വിട്ടയക്കാനുള്ള പട്ടികയിലുള്ളത്. ശിക്ഷായിളവിന് മുന്നോടിയായി പ്രതികളുടെ പൊലീസ് റിപ്പോർട്ട് തേടിക്കൊണ്ട് കണ്ണൂർ സെൻട്രൽ ജയിൽ സൂപ്രണ്ടാണ് പൊലീസിന് കത്ത് നൽകി.

ഇതിലൂടെ ഹൈക്കോടതി വിധി മറികടന്നാണ് സർക്കാരിന്റെ നീക്കം. ശിക്ഷാ ഇളവില്ലാത്ത ജീവപര്യന്തം തടവിന് ഹൈക്കോടതി പ്രതികളെ ശിക്ഷിച്ചിരുന്നു. പ്രതികളുടെ അപ്പീൽ തള്ളിയായിരുന്നു ശിക്ഷ വർധിപ്പിച്ചത്. ഇതിനിടയിലാണ് പ്രതികളെ വിട്ടയക്കാനുള്ള നീക്കവുമായി സർക്കാർ മുന്നോട്ട് വരുന്നത്.

ഇതിനിടെ, സർക്കാർ നീക്കത്തിനെതിരെ വിമർശനവുമായി എം.എൽ.എയും ടി.പി ചന്ദ്രശേഖരന്റെ ഭാര്യയുമായ കെ.കെ രമ. പ്രതികളെ വിട്ടയക്കാനുള്ള സർക്കാർ നീക്കം ​ഗുരുതരമായ കോടതിയലക്ഷ്യമാണെന്ന് കെകെ രമ പറഞ്ഞു. ഇതിനെതിരെ കോടതിയെ സമീപിക്കും. രാഷ്ട്രീയപരമായും നിയമപരമായും പ്രതിരോധിക്കുമെന്നും രമ പ്രതികരിച്ചു.