ഒ.ആർ കേളു സംസ്ഥാന മന്ത്രിസഭയിൽ അംഗമാകും!, കെ.രാധാകൃഷ്ണൻ വഹിച്ച എല്ലാ വകുപ്പുകളും കേളുവിന് ലഭിക്കില്ല, കോവൂർ കുഞ്ഞുമോനെ തള്ളി

തിരുവനന്തപുരം : ലോക്സഭയിലേക്ക് വിജയിച്ചതിനെ തുടർന്ന് കെ രാധാകൃഷ്ണന്‍ രാജിവെച്ച ഒഴിവില്‍ മാനന്തവാടി എം.എല്‍.എ ഒ.ആര്‍ കേളു പട്ടികജാതി-പട്ടിക വര്‍ഗ ക്ഷേമവകുപ്പ് മന്ത്രിയാകും. രണ്ടു തവണ എം.എല്‍.എയായ കേളു നിലവില്‍ സിപിഎം സംസ്ഥാന സമിതി അംഗമാണ്. പട്ടിക വര്‍ഗത്തില്‍ നിന്നുള്ള നേതാവാണ് കേളു. യു.ഡി.എഫ് സർക്കാരിൽ പി.കെ ജയലക്ഷ്മി മന്ത്രിയായ ശേഷം പട്ടിക വർ​ഗ വിഭാ​ഗത്തിൽ നിന്നും മന്ത്രിയാകുന്ന നേതാവാണ് കേളു.

സി.പി.എം സംസ്ഥാന സെക്രട്ടേറിയറ്റ് യോ​ഗത്തിലാണ് തീരുമാനം. കുന്നത്തുനാട് എം.എല്‍.എ പി.വി ശ്രീനിജിന്‍, ബാലുശ്ശേരി എം.എല്‍.എ സച്ചിന്‍ദേവ്, തരൂര്‍ എംഎല്‍എ പി.പി സുമോദ്, കോങ്ങാട് എം.എല്‍.എ ശാന്തകുമാരി തുടങ്ങിയവരെയും പരിഗണിച്ചിരുന്നു.

അതേസമയം കെ രാധാകൃഷ്ണൻ വഹിച്ച എല്ലാ വകുപ്പുകളും കേളുവിന് ലഭിക്കില്ല. പട്ടികജാതി-പട്ടിക വർ​ഗ ക്ഷേമ വകുപ്പുകളാകും കേളുവിന് നൽകുക. രാധാകൃഷ്ണൻ കൈകാര്യം ചെയ്തിരുന്ന ദേവസ്വം വകുപ്പ് വി.എൻ വാസവനും പാർലമെന്ററി കാര്യ വകുപ്പ് എംബി രാജേഷിനും നൽകും.