മൂന്ന് പതിറ്റാണ്ട് നീണ്ട കാത്തിരിപ്പിന് പരിസമാപ്തി...!, 2000 കണ്ടെയ്‌നറും വഹിച്ചെത്തിയ സാൻഫെർണാണ്ടോ അമ്മ കപ്പലിന് വിഴിഞ്ഞം തീരത്ത് വാട്ടർ സല്യൂട്ടിൻ്റെ അകമ്പടിയോടെ വൻ സ്വീകരണം, സുരക്ഷയ്ക്കായി തുറമുഖത്ത് വിന്യസിച്ചത് പോലീസ് കമ്മിഷണർ ജി.സ്പർജ്ജൻകുമാറിന്റെ നേതൃത്വത്തിലുള്ള 1500 പോലീസ് ഉദ്യോഗസ്ഥരെ, 64 പോലീസുകാർ 12 ബോട്ടുകളിലായി കടലിൽ റോന്തുചുറ്റും, ചരിത്ര മുഹൂർത്തത്തിന് സാക്ഷ്യം വഹിച്ച് മന്ത്രിമാരായ വി.എൻ.വാസവനും സജിചെറിയാനും

തിരുവനന്തപുരം : കേരളത്തിന്റെ മൂന്നു പതിറ്റാണ്ടോളം നീണ്ട കാത്തിരിപ്പിന് വിരാമമിട്ട് 2000 കണ്ടെയ്‌നറുകളുമായി സാൻഫെർണാണ്ടോ മദർഷിപ്പ് വിഴിഞ്ഞം തീരത്ത് എത്തിച്ചേർന്നു. വാട്ടർ സല്യൂട്ട് നൽകിയാണ് കപ്പലിനെ സ്വീകരിച്ചത്. വിവിധ ടഗ്ഗുകളാണ് കപ്പലിനെ വിഴിഞ്ഞം തുറമുഖത്തേയ്ക്ക് എത്തിക്കുന്നത്. തുറമുഖ പൈലറ്റ് ടഗ്ഗിലേയ്ക്ക് കയറിയതിനുശേഷം അദ്ദേഹത്തിന്റെ നിയന്ത്രണത്തിലായിരിക്കും മദർഷിപ്പ് തുറമുഖത്തേയ്ക്ക് എത്തിക്കുക. ഒമ്പത് മണിയോടെ കപ്പൽ ബർത്ത് ചെയ്യുമെന്നാണ് വിവരം. 110ലേറെ രാജ്യങ്ങളിൽ കാർഗോ സർവീസ് നടത്തുന്ന മെസ്‌കിന്റെ മദർഷിപ്പാണ് വിഴിഞ്ഞം തുറമുഖത്തെത്തുന്ന സാൻഫെർണാണ്ടോ. ഇന്നലെ രാത്രി വിഴിഞ്ഞം പുറംകടലിലെത്തിയ സാൻഫെർണാണ്ടോ കപ്പൽ പുലർച്ചെ ആറോടെ നാലു നോട്ടിക്കൽമൈൽ അടുത്തേക്ക് അടുപ്പിച്ചിരുന്നു.