തൃക്കരുവയിലെ സ്വകാര്യ സ്കൂളുകൾക്ക് ഒന്നിനും ഫിറ്റ്നസ് ഇല്ല...!, രക്ഷിതാക്കൾ കുട്ടികളെ പറഞ്ഞയച്ചിരിക്കുന്നത് ചതിക്കുഴികളിൽ, യാതൊരു അംഗീകാരവും ഇല്ലാത്ത സ്കൂളുകൾക്ക് ഒത്താശ പാടുന്നത് ജില്ലാ വിദ്യാഭ്യാസ വകുപ്പ് ഉദ്യോഗസ്ഥരും - അഷ്ടമുടി ലൈവ് അന്വേഷണം തുടരുന്നു

തൃക്കരുവ : തൃക്കരുവ ഗ്രാമപഞ്ചായത്ത് പരിധിയിലെ സ്വകാര്യ സ്കൂളുകൾക്ക് ഒന്നിനും ഫിറ്റ്നസ് ഇല്ലെന്ന് ഔദ്യോഗിക വിവരം. ഫിറ്റ്നസ് സർട്ടിഫിക്കറ്റ് ഇല്ലാത്ത കെട്ടിടങ്ങളിൽ സ്കൂൾ പ്രവർത്തിക്കരുത് എന്ന് വിദ്യാഭ്യാസ വകുപ്പിന്റെ നിർദ്ദേശം നിലനിൽക്കെയാണ് അധികൃതരുടെ ഒത്താശയോടെ തൃക്കരുവ ഉൾപ്പെടെയുള്ള കൊല്ലം ജില്ലയുടെ വിവിധ മേഖലകളിൽ സ്വകാര്യ സ്കൂൾ മാഫിയകൾ പകൽ വെളിച്ചത്തിൽ വിലസുന്നത്. തദ്ദേശ സ്വയംഭരണ സ്ഥാപനങ്ങളാണ് ഇത്തരത്തിൽ ഫിറ്റ്നസ് സർട്ടിഫിക്കറ്റുകൾ സ്വകാര്യ സ്കൂളുകൾക്ക് അനുവദിക്കേണ്ടത്. ഇതില്ലാത്ത സ്കൂളുകളെ തദ്ദേശ സ്വയംഭരണ സ്ഥാപനമായ ഗ്രാമപഞ്ചായത്തുകൾക്കും കോർപ്പറേഷനുകൾക്കും തന്നെ നോട്ടീസ് നൽകി പൂട്ടിക്കാവുന്നതാണ്. ഈ കഴിഞ്ഞ മെയിലും സ്കൂൾ തുറക്കുന്നതിന് മുന്നോടിയായി ഫിറ്റ്നസ് സർട്ടിഫിക്കറ്റ് സ്കൂളുകൾ ഉറപ്പുവരുത്തണമെന്ന് വിദ്യാഭ്യാസ വകുപ്പ് ഡയറക്ടർ നേരിട്ട് നിർദേശം നൽകിയിരുന്നു. ഈ നിർദ്ദേശം പാലിക്കപ്പെട്ടില്ല എന്ന് മാത്രമല്ല ഇത്തരം സ്കൂളുകളെ പരിശോധനയ്ക്ക് വിധേയമാക്കാതെ ഒഴിവാക്കുകയാണ് വകുപ്പ് ഉദ്യോഗസ്ഥർ ജില്ലയിൽ ചെയ്യുന്നത്. അതേ സമയം, വിദ്യാഭ്യാസ വകുപ്പ് കൂടാതെ ഭരണ തലത്തിൽ മുഖ്യമന്ത്രിയും ഉത്തരവിലൂടെ വിഷയത്തിൽ തദ്ദേശ സ്വയംഭരണ സ്ഥാപനങ്ങള്‍ ഇതിനുള്ള നടപടി പൂര്‍ത്തീകരിക്കണമെന്ന് ആവശ്യപ്പെട്ടിരുന്നു. 

ഈ കഴിഞ്ഞ മാസം മുതലാണ് അഷ്ടമുടി ലൈവിന്റെ ' പാഠം ഒന്ന് - അനധികൃത വിദ്യാലയങ്ങൾ' എന്ന അന്വേഷണ പരമ്പരയിലൂടെ കൊല്ലം ജില്ലയിലെ അനധികൃത സ്കൂളുകളെ സംബന്ധിച്ച് ഞെട്ടിക്കുന്ന വിവരങ്ങൾ പൊതുജന സമക്ഷം പുറത്തുവിട്ടത്. വിഷയത്തിൽ സമൂഹത്തിൽ വലിയ തോതിലുള്ള പ്രതിഷേധങ്ങൾ ഉയർന്നു വരുന്നുണ്ട്. സംസ്ഥാനത്ത് ആകെ അംഗീകൃത സ്കൂളുകളെക്കാൾ ഇരട്ടി അനധികൃത സ്കൂളുകൾ പ്രവർത്തിക്കുന്നുണ്ട് അതാണ് വിദ്യാഭ്യാസ വകുപ്പിന്റെ തന്നെ അനൗദ്യോഗിക കണക്കുകൾ സൂചിപ്പിക്കുന്നത്. ഇതിൽ പലതും വിദ്യാഭ്യാസ വകുപ്പ് ഉദ്യോഗസ്ഥർക്ക് നേരിട്ട് അറിയാവുന്നതും പലതവണ പൂട്ടിച്ചതുമായ സ്കൂളുകളാണ്. എന്നാൽ സാമ്പത്തിക ലാഭം മുൻനിർത്തിയാണ് പല ഉദ്യോഗസ്ഥരും ഇത്തരം സ്കൂളുകളിലേക്ക് പരിശോധനയ്ക്ക് ചെല്ലാത്തതെന്നും മറ്റ് ചിലയിടങ്ങളിൽ ഭരണാനുകൂല പിടിപാട് ഉണ്ടായതുകൊണ്ടാണ് പരിശോധന നടക്കാത്തതെന്നും ഒരു വിഭാഗം ആരോപിക്കുന്നുണ്ട്.