സുഹൃത്തിന് മെസേജ് അയച്ച ശേഷം യുവാവ് പുഴയില്‍ ചാടിയ സംഭവം....!, മൂന്നുദിവസത്തെ തിരച്ചിലിനൊടുവിൽ യുവാവിന്റെ മൃതദേഹം കണ്ടെത്തി

ഇരിങ്ങാലക്കുട : മൂന്നര ദിവസത്തെ തിരച്ചിലിനു ശേഷം കരുവന്നൂർ പുഴയിൽച്ചാടിയ യുവാവിന്റെ മൃതദേഹം കണ്ടെത്തി. ഇരിങ്ങാലക്കുട കൊരുമ്പിശ്ശേരി സ്വദേശി വലിയവീട്ടിൽ പരേതനായ വേണുവിന്റെ മകൻ ഹരികൃഷ്ണന്റെ (21)  മൃതദേഹമാണ് കണ്ടെത്തിയത്.

ശനിയാഴ്ച പകല്‍  ഫയർഫോഴ്സ് നടത്തിയ തെരച്ചിലിൽ മൂർക്കനാട് ഇല്ലിക്കൽ ഡാം പരിസരത്ത് മരച്ചില്ലകൾക്കിടയിൽ കുടുങ്ങിയ നിലയിലായിരുന്നു മൃതദേഹം കിട്ടിയത്‌. ബുധനാഴ്ച രാത്രി 9.3o ന്‌ സുഹൃത്തുക്കൾക്ക് ഫോണിൽ സന്ദേശം അയച്ച്‌ ബൈക്ക്‌ ബസ്‌സ്റ്റാന്റ്‌ പരിസരത്തുവെച്ച്‌ ഹരികൃഷ്ണന്‍ കരുവന്നൂർ വലിയ പാലത്തിന് മുകളിൽ നിന്ന് പുഴയിലേക്ക്‌ ചാടുകയായിരുന്നു.  

പുഴയിൽ അടിയൊഴുക്ക്‌ ഉണ്ടായിരുന്നതിനാൽ ഇരിങ്ങാലക്കുട, പുതുക്കാട്, തൃശൂർ എന്നിവിടങ്ങളിൽ നിന്നുള്ള ഫയർഫോഴ്സ്, സ്കൂബാ ടീമുകള്‍ മൂന്ന് ദിവസമായി തെരച്ചിൽ നടത്തിയിരുന്നു. മൃതദേഹം താലൂക്ക്‌ ആശുപത്രിയിലേക്ക്‌ മാറ്റി.

പാലത്തിൽ നിന്ന് പുഴയിൽ ചാടുന്നവരുടെ എണ്ണം വർധിക്കുന്നതിനാൽ പാലത്തിന്റെ ഇരുവശങ്ങളിലും കമ്പിവേലി കെട്ടി സംരക്ഷിക്കുന്നതിന് നടപടി സ്വീകരിച്ചതായി മന്ത്രി ആർ ബിന്ദു അറിയിച്ചിട്ടുണ്ട്. ഡിപ്ലോമ വിദ്യാർഥിയാണ് ഹരികൃഷ്ണൻ. അമ്മ: രമ ഭായി. സഹോദരൻ: ഉണ്ണിക്കൃഷ്ണൻ.