അന്തരിച്ച മുൻ മുഖ്യമന്ത്രി ഉമ്മൻചാണ്ടിയുടെ സ്മരണകൾക്ക് ഇന്ന് ഒരാണ്ട്...!, കൊല്ലത്ത് മൂന്നരയ്ക്ക് ആനന്ദവല്ലീശ്വരത്ത് നിന്ന് ചിന്നക്കടയിലേക്ക് ഉമ്മൻചാണ്ടി സ്മൃതി യാത്ര

സ്വന്തം ലേഖകൻ

കോൺഗ്രസ് നേതാവും മുൻ മുഖ്യമന്ത്രിയും ആയിരുന്ന ഉമ്മൻചാണ്ടി ഓർമ്മയായിട്ട് ഇന്ന് ഒരാണ്ട്. ഓർമ്മദിനമായ ഇന്ന് വിപുലമായ അനുസ്മരണ പരിപാടികൾ ആണ് കോൺഗ്രസ് പാർട്ടി സംഘടിപ്പിക്കുന്നത്. പുതുപ്പള്ളിയിൽ നടക്കുന്ന പരിപാടി ഗവർണർ ആരിഫ് മുഹമ്മദ് ഖാൻ ഉദ്ഘാടനം ചെയ്യും.

കെപിസിസി സംഘടിപ്പിക്കുന്ന സംസ്ഥാനതല പരിപാടിയിൽ പങ്കെടുക്കുന്നതിനായി കോൺഗ്രസിന്റെ മുതിർന്ന നേതാക്കളെല്ലാം കോട്ടയത്ത് എത്തും.ഓർമ്മ ദിനത്തോട് അനുബന്ധിച്ച പ്രാർത്ഥനകൾക്കും വിശുദ്ധ കുർബാനയ്ക്കും ശേഷം പുതുപ്പള്ളി സെന്റ് ജോർജ് ഓർത്തഡോക്സ് പള്ളിയിലെ കല്ലറയിൽ ഓർത്തഡോക്സ് സഭ അധ്യക്ഷന്റെ നേതൃത്വത്തിൽ ധൂപ പ്രാർത്ഥന നടത്തും.വൈകിട്ട് മൂന്നരയ്ക്കാണ് കെപിസിസി സംഘടിപ്പിക്കുന്ന അനുസ്മരണ പരിപാടി.

കൊല്ലത്ത് ഇങ്ങനെ

മുൻ മുഖ്യമന്ത്രിയും കോൺഗ്രസ് നേതാവുമായിരുന്ന ഉമ്മൻചാണ്ടിയുടെ ഒന്നാം ചരമ വാർഷികം ജില്ലാ കോൺഗ്രസ് കമ്മിറ്റിയുടെയും ബ്ലോക്ക് - മണ്ഡലം ബൂത്ത് കമ്മിറ്റികളുടെയും പോഷക സംഘടനകളുടെയും നേതൃത്വത്തിൽ ആചരിക്കും. ഇന്ന് രാവിലെ 9.30ന് ഡി.സി.സിയിൽ പുഷ്പാർച്ചനയും 10.30ന് അനുസ്മരണ സമ്മേളനവും നടക്കും. മുൻമന്ത്രി സി.വി.പത്മരാജൻ ഉദ്ഘാടനം ചെയ്യും. വൈകിട്ട് 3ന് മുണ്ടയ്ക്കൽ പുവർഹോമിൽ ഭക്ഷണം. 3.30ന് ആനന്ദവല്ലീശ്വരത്ത് നിന്ന് ചിന്നക്കടയിലേക്ക് ഉമ്മൻചാണ്ടി സ്മൃതി യാത്ര. ചിന്നക്കടയിലെ സമ്മേളനം മുൻ മന്ത്രി വി.എം.സുധീരൻ ഉദ്ഘാടനം ചെയ്യും. മുൻമന്ത്രി ഷിബുബേബിജോൺ, മലങ്കര ഓർത്തഡോക്സ് സഭ കൊല്ലം ഡയോസിസ് മെത്രോപ്പൊലീത്ത ഡോ. ജോസഫ് മാർ ഇവാനിയോസ്, ഫാ. ഫെർഡിനന്റ് കായാവിൽ, കടയ്ക്കൽ അബ്ദുൽ അസീസ് മൗലവി, സ്വാമി ബോധേന്ദ്രതീർത്ഥ എന്നിവർ അനുസ്മര പ്രഭാഷണം നടത്തും. എം.എൽ.എമാരായ പി.സി.വിഷ്ണുനാഥ്, സി.ആർ.മഹേഷ്, നേതാക്കളായ ശൂരനാട് രാജശേഖരൻ, ബിന്ദുകൃഷ്ണ, എം.എം.നസീർ, പഴകുളംമധു, എ.ഷാനവാസ്ഖാൻ, ജ്യോതികുമാർ ചാമക്കാല, കെ.സി.രാജൻ തുടങ്ങിയവർ പങ്കെടുക്കും.