റോഡ് മുറിച്ച് കടക്കുന്നതിനിടെ ബൈക്ക് ഇടിച്ച് അപകടം...!, പരിക്കേറ്റയാൾ വീടിനുള്ളിൽ ചികിത്സ ലഭിക്കാതെ മരിച്ച നിലയിൽ, ഇദ്ദേഹത്തെ വീട്ടിലെത്തിച്ച് കടന്നുകളഞ്ഞത് യുവാക്കൾ

തിരുവനന്തപുരം : വെള്ളറടയിൽ ബൈക്ക് ഇടിച്ച് പരിക്കേറ്റയാളെ മരിച്ച നിലയിൽ കണ്ടെത്തി. കലിങ്ക് നട സ്വദേശി സുരേഷ് (52) ആണ് ചികിത്സ ലഭിക്കാത്തതിനെ തുടർന്ന് മരിച്ചത്.

കഴിഞ്ഞ ശനിയാഴ്ച രാത്രിയോടെ സുരേഷ് റോഡ് മുറിച്ച് കടക്കുന്നതിനിടെ ബൈക്കിൽ സഞ്ചരിച്ച 2 യുവാക്കൾ സുരേഷിനെ ഇടിച്ച് വീഴ്ത്തിയതാണ് എന്നാണ് സംഭവവുമായി ബന്ധപ്പെട്ട് പോലീസ് നൽകുന്ന വിവരം. അപകടത്തിൽ സുരേഷിന് ഗുരുതരമായി പരുക്കേൽക്കുകയും, ബൈക്ക് യാത്രക്കാർ സുരേഷിനെ വീടിനുള്ളിലാക്കി കടന്നുകളയുകയുമായിരുന്നു.

ദുർഗന്ധം വമിച്ചതോടെ നാട്ടുകാർ നടത്തിയ പരിശോധനയിലാണ് മുറിയിൽ നിന്നും ഇയാളുടെ മൃതദ്ദേഹം കണ്ടെത്തിയത്. ആന്തരിക അവയങ്ങൾക്ക് ഉൾപ്പടെ പരിക്കേറ്റിരുന്നതായാണ് പുറത്തുവരുന്ന വിവരം.

സുരേഷിന്റെ മൃതദ്ദേഹം അഴുകിയ നിലയിലായിരുന്നു എന്ന് പരിസരവാസികൾ പറഞ്ഞു. സംഭവവുമായി ബന്ധപ്പെട്ട് പോലീസ് സി.സി.ടി.വി ദൃശ്യങ്ങളും ശേഖരിച്ചിട്ടുണ്ട്. വാഹനം കണ്ടെത്താനുള്ള ശ്രമം തുടരുന്നതായി പോലീസ് അറിയിച്ചു.