അമ്മമാരുടെയും കുട്ടികളുടെയും ആശുപത്രിയിൽ വൈദ്യുതി മുടങ്ങി...!, ഡോക്ടറുമാർ പരിശോധന നടത്തിയത് ടോർച്ച് വെളിച്ചത്തിൽ, പ്രതിഷേധിച്ചതോടെ താൽക്കാലിക പരിഹാരം

തിരുവനന്തപുരം : അമ്മമാരുടെയും കുട്ടികളുടെയും (എസ്‌എടി) ആശുപത്രിയിൽ വൈദ്യുതി മുടങ്ങി. രണ്ടുദിവസമായി വൈദ്യുതി ഇല്ലെന്നാണ് സൂചന. ജനറേറ്റർ കേടായി വൈദ്യുതി പൂർണമായും നിലച്ചിട്ട് മൂന്ന് മണിക്കൂറിലേറെയായി. അത്യാഹിത വിഭാഗം ബ്ലോക്കിലാണ് വൈദ്യതി മുടങ്ങിയത്. എന്നാൽ ഓപ്പറേഷൻ തിയേറ്ററിലും ഐസിയുവിലും വൈദ്യുതിയില്ലെന്നാണ് രോഗികൾ വ്യക്തമാക്കുന്നത്. എന്നാൽ ഇവിടെയൊക്കെ വൈദ്യുതിയുണ്ടെന്നാണ് ഡെപ്യൂട്ടി സൂപ്രണ്ടിന്റെ വാദം.

ആശുപത്രിക്ക് മുന്നിൽ വലിയ പ്രതിഷേധം ആരംഭിച്ചതോടെ പൊലീസ് തമ്പടിച്ചു. വൈദ്യുതി മുടങ്ങിയതിന് പിന്നാലെ ജനറേറ്ററും കേടായത് പ്രതിസന്ധി വർദ്ധിപ്പിച്ചു. പിഡബ്ല്യൂഡി ഇലക്ട്രിക്കൽ വിഭാഗം വൈദ്യുതി പുനഃസ്ഥാപിക്കാൻ ശ്രമം തുടരുകയാണ്. താത്കാലിക ജനറേറ്റർ ഉടൻ എത്തിക്കുമെന്നാണ് ആരോഗ്യമന്ത്രിയുടെ വാദം. കെ.എസ്.ഇ.ബിയുടെ ഭാഗത്ത് വീഴ്ചകളില്ലെന്ന് അവർ വ്യക്തമാക്കി.

എസ്എടി ആശുപത്രിയിലെ അത്യാഹിത വിഭാഗത്തിലുണ്ടായ വൈദ്യുതി തടസത്തിന് താത്കാലിക പരിഹാരമായി. ജനറേറ്റർ ഉപയോ​ഗിച്ച് വൈദ്യുതി പുനസ്ഥാപിച്ചു. രോഗികളുടെ ബന്ധുക്കളുടെ പ്രതിഷേധം ശക്തമായ സാഹചര്യത്തിലാണണ് ജനറേറ്റർ എത്തിച്ചത്. മൂന്നു മണിക്കൂറിന് ശേഷമാണ് പ്രശ്നത്തിന് പരിഹാരമായത്. രണ്ട് ജനറേറ്ററാണ് പ്രവർത്തിപ്പിച്ചു കൊണ്ടിരിക്കുന്നത്.