കൊല്ലം കോർപ്പറേഷനിലെ ജനസംഖ്യ കൂടിയ വാർഡുകൾ മുറിക്കുന്നു..!, മുറിവ് കൂട്ടിച്ചേർക്കുന്നതോടെ വാർഡുകളുടെ എണ്ണം 56

കൊല്ലം : കൊല്ലം കോർപ്പറേഷനിൽ തദ്ദേശ തിരഞ്ഞെടുപ്പിന് മുന്നോടിയായി വാർഡ് വിഭജനം സാധ്യമാക്കുന്നതിനുള്ള പ്രാഥമിക നടപടികൾ തുടങ്ങി. കൊല്ലം കോർപ്പറേഷനിൽ നിലവിൽ 55 വാർഡുകളാണുള്ളത്. ഒരു വാർഡ് കൂടി വിഭജനങ്ങളുടെ ഭാഗമായി കൂട്ടിച്ചേർക്കുന്നതോടെ എണ്ണം 56 ആകും. ജനപ്രതിനിധികളുടെ എണ്ണം 2011-ലെ സെൻസസിനെ അടിസ്ഥാനമാക്കി വർധിപ്പിക്കുന്നതിന്റെ ഭാഗമായാണ് വാർഡ് വിഭജനം നടത്തുന്നത്. വാർഡ് വിഭജനാവശ്യമായ നിർദേശങ്ങൾ തയ്യാറാക്കി തിരഞ്ഞെടുപ്പ് കമ്മിഷന് സമർപ്പിക്കുന്നതിന് ജില്ലാ തിരഞ്ഞെടുപ്പ് ഉദ്യോഗസ്ഥന് കോർപ്പറേഷൻ സെക്രട്ടറി 25-നകം കരട് നിർദേശങ്ങൾ നൽകണമെന്നാണ് നിർദേശം. നിർദിഷ്ട വാർഡുകളുടെ അതിർത്തികൾ രേഖപ്പെടുത്തിയുള്ള ഡിജിറ്റൽ ഭൂപടവും നിലവിലെ വാർഡുകളിലെ അതിർത്തി രേഖപ്പെടുത്തിയുള്ള ഭൂപടവും സെക്രട്ടറി സാക്ഷ്യപ്പെടുത്തി കരട് നിർദേശങ്ങളിൽ ഉൾപ്പെടുത്തണം.  

കൊല്ലം ഈസ്റ്റ്, കൊല്ലം വെസ്റ്റ്, മുണ്ടയ്ക്കൽ, കിളികൊല്ലൂർ, മങ്ങാട്, വടക്കേവിള, ശക്തികുളങ്ങര, ഇരവിപുരം, തൃക്കടവൂർ തുടങ്ങിയവയാണ് കൊല്ലം കോർപ്പറേഷൻ ഉൾപ്പെടുന്ന വില്ലേജുകൾ. 2011-ലെ സെൻസസ് പ്രകാരം കൊല്ലം കോർപ്പറേഷൻ പരിധിയിൽ മൂന്നുലക്ഷത്തിലേറെ (3,88,288) ജനങ്ങളുണ്ട്. ഇതിൽ 2,01,249 സ്ത്രീകളും 1,87,039 പുരുഷന്മാരുമെന്നാണ് കോർപ്പറേഷന്റെ ഔദ്യോഗിക കണക്ക്. സംവരണ വാർഡുകൾ കൂടിയേക്കും കൊല്ലം കോർപ്പറേഷനിൽ നിലവിലെ ഡിവിഷനുകളുടെ എണ്ണം 55 ആണ്. വാർഡ് വിഭജനം പൂർത്തിയാകുമ്പോൾ ഡിവിഷൻ 56 ആകും.