കാറ്റിലും മഴയിലും സ്വന്തം വസ്തുവിലെ മരം വീണ് വീടിന് കേടുപാട് സംഭവിച്ചാൽ ധനസഹായം ലഭ്യമോ?....!, സത്യം ഇതാണ്; ജനങ്ങളെ തെറ്റിദ്ധരിപ്പിക്കരുത്

അഞ്ചാലുംമൂട് : കൊല്ലം ജില്ലയിൽ ഉൾപ്പെടെ സംസ്ഥാനത്ത് കനത്ത മഴയും കാറ്റും തുടരുന്ന സാഹചര്യത്തിൽ, സ്വന്തം വസ്തുവിൽ നിൽക്കുന്ന മരങ്ങൾ ഒടിഞ്ഞ് വീണ് വീടുകൾക്ക് കേടുപാടുകൾ സംഭവിക്കുന്നത് ആശങ്കയുയർത്തുന്നു. തൃക്കരുവ, പനയം, പെരിനാട് തുടങ്ങിയ പ്രദേശങ്ങളിൽ ഇത്തരം സംഭവങ്ങൾ റിപ്പോർട്ട് ചെയ്തിട്ടുണ്ട്. എന്നാൽ, ഇത്തരം സാഹചര്യങ്ങളിൽ ദുരന്തബാധിതർക്ക് ധനസഹായം ലഭിക്കുമോ എന്ന ചോദ്യം നിലനിൽക്കുന്നു. എന്നാൽ ലഭിക്കുമെന്നാണ് ദുരന്തനിവാരണ നിയമവും കേരള സംസ്ഥാന ദുരന്ത നിവാരണ അതോറിറ്റി(SDMA)യും നിബന്ധനകളോടെ വ്യക്തമാക്കുന്നത്. ദുരന്ത നിവാരണ നിയമം, 2005 പ്രകാരം, കാറ്റിലും മഴയിലും മരം വീണ് വീടിന് കേടുപാടുകൾ സംഭവിച്ചാൽ, സംസ്ഥാന ദുരന്ത നിവാരണ നിധി (SDRF) വഴി ധനസഹായം ലഭിച്ചേക്കാം. 2025 ജനുവരി 10-ന് സർക്കാർ അംഗീകരിച്ച പുതിയ സ്ലാബുകൾ പ്രകാരം, നാശനഷ്ടത്തിന്റെ തോത് അനുസരിച്ച് തുക നിർണയിക്കും. കുറഞ്ഞത് 15% നാശനഷ്ടത്തിന് ₹10,000 മുതൽ 70%ന് മുകളിൽ നാശനഷ്ടത്തിന് ₹4,00,000 വരെ ലഭിക്കാമെന്ന് അധികൃതർ വ്യക്തമാക്കി.

വില്ലേജ് ഓഫീസർമാരും റവന്യൂ വകുപ്പ് ഉദ്യോഗസ്ഥരും സ്ഥലം സന്ദർശിച്ച് നാശനഷ്ടം വിലയിരുത്തി, ഗ്രാമപഞ്ചായത്ത് അല്ലെങ്കിൽ മുനിസിപ്പാലിറ്റി വഴി സഹായം വിതരണം ചെയ്യും. എന്നാൽ, മരം സ്വന്തം വസ്തുവിൽ നിന്ന് വീണതാണെങ്കിൽ, അശ്രദ്ധയുണ്ടോ എന്ന് പരിശോധിക്കാമെന്നും, ഇത് സഹായത്തെ ബാധിച്ചേക്കാമെന്നും റവന്യൂ വകുപ്പ് ഉദ്യോഗസ്ഥർ അറിയിച്ചു. പ്രകൃതിക്ഷോഭം മൂലമുള്ള നാശനഷ്ടമാണെങ്കിൽ, സാധാരണയായി സഹായം ലഭിക്കുമെന്നാണ് വിവരം. ദുരന്തബാധിതർ പ്രാദേശിക വില്ലേജ് ഓഫീസ്, ഗ്രാമപഞ്ചായത്ത്, അല്ലെങ്കിൽ റവന്യൂ വകുപ്പ് ഓഫീസുകളുമായി ബന്ധപ്പെട്ട ശേഷം അവരുടെ നിർദ്ദേശാനുസരണം അപേക്ഷ നൽകണം. നാശനഷ്ടത്തിന്റെ ഫോട്ടോകൾ, ആധാർ കാർഡ്, ബാങ്ക് വിവരങ്ങൾ എന്നിവ സഹിതമാണ് അപേക്ഷ സമർപ്പിക്കേണ്ടത്. കൂടുതൽ വിവരങ്ങൾക്ക് കേരള സംസ്ഥാന ദുരന്ത നിവാരണ അതോറിറ്റിയുടെ വെബ്സൈറ്റ് (https://sdma.kerala.gov.in) പരിശോധിക്കാവുന്നതാണ്.