മം​ഗളൂരുവിൽ മലയാളിയെ ആൾക്കൂട്ടം മർദിച്ച് കൊലപ്പെടുത്തിയ സംഭവം; കേസിൽ വീഴ്ച വരുത്തിയതിന് മൂന്ന് പോലീസുകാരെ സസ്‌പെൻഡ് ചെയ്തു

മം​ഗളൂരുവിൽ മലയാളിയായ അഷ്റഫിനെ ആൾക്കൂട്ടം മർദിച്ച് കൊലപ്പെടുത്തിയതുമായി ബന്ധപ്പെട്ട് മം​ഗളൂരു റൂറൽ പൊലീസ് സ്റ്റേഷനിലെ മൂന്ന് പൊലീസുകാരെ സസ്പെൻഡ് ചെയ്തു. സ്റ്റേഷൻ എസ്.ഐ ശിവകുമാർ അടക്കം മൂന്ന് പേരെയാണ് സസ്പെൻഡ് ചെയ്തത്.

പൊലീസ് വിഷയത്തിൽ വേണ്ടത്ര ​ഗൗരവത്തിൽ ഇടപെട്ടില്ല എന്നാരോപണമുയർന്നതിനെ തുടർന്നാണ് നടപടി. ആൾക്കൂട്ടം അശ്റഫിനെ മർദിച്ച് കൊലപ്പെടുത്തിയ വിവരം ദീപക് എന്ന യുവാവ് പൊലീസ് സ്റ്റേഷനിൽ അറിയിച്ചിട്ടും മേലുദ്യോ​ഗസ്ഥരെ അറിയിക്കാതെ വിഷയം മൂടിവെക്കാൻ ശ്രമിച്ചുവെന്ന് ആരോപണമുയർന്നിരുന്നു. പരാതി സ്വീകരിച്ചതിന് ശേഷവും ആദ്യം അസ്വാഭാവിക മരണത്തിന് രജിസ്റ്റർ ചെയ്ത കേസ് പിന്നീട് ആൾക്കൂട്ടക്കൊല കേസായി മാറ്റുകയായിരുന്നു.

മൃതദേഹം ടാർപ്പോളിൻ ഷീറ്റിട്ട് മൂടിയ ശേഷം 2 മണിക്കൂർ ദേഹം വഴിയിൽ കിടത്തി. ആദ്യം റിപ്പോർട്ട് ചെയ്തത് അസ്വാഭാവിക മരണം എന്ന് മാത്രമാണ്. പിന്നീട് 3 ദിവസം കഴിഞ്ഞാണ് ആൾക്കൂട്ട കൊലപാതകമെന്ന വകുപ്പ് ചുമത്തി കേസെടുത്തത്. കൃത്യ വിലോപത്തിനും ആൾക്കൂട്ടക്കൊലയെന്ന വകുപ്പ് ചുമത്തി കേസ് രജിസ്റ്റർ ചെയ്യാതിരുന്നതും ചൂണ്ടിക്കാട്ടിയാണ് മൂന്ന് പേരെയും സസ്പെൻഡ് ചെയ്തത്.