‘പ്രതികരിക്കാത്തത് ഭാഷ വശമില്ലാത്തത് കൊണ്ടല്ല, ഉള്ളിൽ ബഹുമാനം അവശേഷിക്കുന്നത് കൊണ്ടാണ്’; ജി സുധാകരനെതിരെ അമ്പലപ്പുഴ എംഎൽഎ എച്ച് സലാം

ആലപ്പുഴ : മുൻ മന്ത്രിയും സിപിഐഎം നേതാവുമായ ജി സുധാകരനെതിരെ അമ്പലപ്പുഴ എംഎൽഎ എച്ച് സലാം രംഗത്ത്. കുഞ്ചൻ നമ്പ്യാർ സ്മാരകത്തിന്റെ നിർമാണം ശരിയല്ലെന്നും യുദ്ധക്കളമാക്കിയെന്നുമുള്ള ജി സുധാകരന്റെ പ്രസ്താവനയ്‌ക്കെതിരെ യാണ് എച്ച് സലാം രംഗത്തുവന്നത്. ഫേസ്ബുക്കിലൂടെയായിരുന്നു എച്ച് സലാമിന്റെ പ്രതികരണം. എംഎൽഎ എന്ന നിലയിലും സ്മാരകസമിതിയുടെ ഭാഗമായും നിന്നുകൊണ്ട് പുതിയ മന്ദിരത്തിന്റെ നിർമ്മാണത്തിൽ താൻ വ്യക്തിപരമായ ഉത്തരവാദിത്വം നിർവഹിച്ചിട്ടുണ്ട്. അമ്പലപ്പുഴ രാമവർമ്മ ചെയർമാൻ ആയിരുന്നപ്പോഴും പള്ളിപ്പുറം മുരളി ചെയർമാൻ ആയിരുന്ന കഴിഞ്ഞ സർക്കാരിന്റെ കാലത്തും സ്മാരക സമിതിയുടെ വൈസ് ചെയർമാനായി താൻ പ്രവർത്തിച്ചിരുന്നു. 

ആ സമയം മുതൽ സ്മാരകത്തിന്റെ വികസനത്തിന്‌ വേണ്ടി ഏറെ താല്പര്യപൂർവ്വമാണ് താൻ പ്രവർത്തിക്കുന്നത് എന്നും എംഎൽഎ കുറിച്ചു. ശേഷം ജി സുധാകരനെതിരെ രൂക്ഷവിമർശനം നടത്തി. അനാവശ്യങ്ങൾ പലപ്പോഴും പറയുമ്പോഴും പ്രതികരിക്കാത്തത് ഭാഷ വശമില്ലാത്തത് കൊണ്ടോ പറയാൻ അറിയാത്തത് കൊണ്ടോ അല്ല, തന്നെ പോലെയുള്ളവരുടെ ഉള്ളിൽ ബഹുമാനം അവശേഷിക്കുന്നത് കൊണ്ടാണ്. അത് ഇനിയും കളഞ്ഞുകുളിക്കരുത് എന്നും എച്ച് സലാം മുന്നറിയിപ്പ് നൽകുന്നു.

സുധാകരൻ ഉദ്‌ഘാടനം ചെയ്ത പഴയ ഫലകം ഇപ്പോൾ ഇല്ല എന്ന വാദം തെറ്റാണെന്നും സലാം ചിത്രങ്ങൾ അടക്കം പങ്കുവെച്ചുകൊണ്ട് പറയുന്നു. നിർമ്മാണത്തിന്റെ ഓരോ കാര്യങ്ങളും അതാത് സമയത്ത് സ്മാരകസമിതി ചർച്ച ചെയ്ത് കൊണ്ടും നിർമ്മാണ സബ്കമ്മിറ്റി മേൽനോട്ടം വഹിച്ചുകൊണ്ടുമാണ് നടത്തിയിട്ടുള്ളത്. മനോഹരമായ സാംസ്‌കാരിക കേന്ദ്രം നിർമ്മിക്കുവാൻ ആത്മാർത്ഥമായി പരിശ്രമിച്ച സ്മാരക സമിതി അംഗങ്ങളുടെ അന്തസ്സ് ഇടിച്ചു താഴ്ത്താൻ ദയവായി പരിശ്രമിക്കരുത് എന്നും സുധാകരനോട് സലാം അഭ്യർത്ഥിക്കുന്നു. കുഞ്ചൻ നമ്പ്യാർ സ്മാരകം പരിപാലനമില്ലാതെ നശിക്കുകയാണെന്നും താൻ എംഎൽഎ ആയിരുന്ന കാലത്ത് പണം അനുവദിച്ചതാണെന്നുമായിരുന്നു സുധാകരൻ പറഞ്ഞിരുന്നത്. സ്മാരകം ഒരു യുദ്ധക്കളമായി മാറിയിരിക്കുകയാണ്. പ്രതിമയും, ഹോളും മറ്റുമെല്ലാം നശിച്ചു തുടങ്ങിയിരിക്കുന്നു. എച്ച് സലാമിന്റെ പേര് എടുത്തുപറയാതെയായിരുന്നു സുധാക രന്റെ വിമർശനം. ഇതിനാണ് സലാം മറുപടിയുമായി രംഗത്തുവന്നിരിക്കുന്നത്.