മകന്റെ പ്ലസ് വൺ പ്രവേശനത്തിന് പിതാവിന് പരോൾ അനുവദിച്ച് ഹൈക്കോടതി...!, പരോൾ അനുവദിച്ചത് പിതാവിനെ കൊലപ്പെടുത്തിയ കേസിലെ പ്രതിക്ക്

കൊച്ചി : മകന്റെ പ്ലസ് വൺ പ്രവേശനത്തിനായി പിതാവിന് പരോൾ അനുവദിച്ച് ഹൈക്കോടതി. പാലക്കാട് സ്വദേശിക്കാണ് ജസ്റ്റിസ് പി.വി. കുഞ്ഞികൃഷ്ണൻ ഏഴുദിവസത്തെ പരോൾ അനുവദിച്ചത്.

ജീവപര്യന്തം തടവിനു ശിക്ഷിക്കപ്പെട്ട് തവനൂർ സെൻട്രൽ ജയിലിൽ കഴിയുന്ന പ്രതിയുടെ മകൻ പത്താം ക്ലാസിൽ ആറ് എ പ്ലസും രണ്ട് എയും നേടിയാണ് പാസായത്. കുട്ടിയുടെ മാർക്ക് ലിസ്റ്റ് പരിശോധിച്ചശേഷമാണ് കോടതി ഉത്തരവ്.

പഠിക്കാൻ മിടുക്കനായ കുട്ടി തന്റെ തുടർപഠനത്തിന് പ്രവേശനം നേടാൻ പിതാവിന്റെ സാന്നിധ്യവും അനുഗ്രഹവും വേണമെന്നാഗ്രഹിക്കുമ്പോൾ കണ്ടില്ലെന്നു നടിക്കാനാകില്ല. മകന് മികച്ച വിദ്യാഭ്യാസം ലഭിക്കണമെന്നത് തടവുകാരന്റെയും അവകാശമാണ് എന്ന് കോടതി പറഞ്ഞു..

മാതാപിതാക്കളുടെ അനുഗ്രഹവും വാങ്ങി ചെറുപുഞ്ചിരിയോടെ അവൻ പ്ലസ്ടു പഠനത്തിനായി പോകട്ടെ. നല്ലഭാവിക്കായി അവനെ സർവശക്തൻ അനുഗ്രഹിക്കട്ടെ എന്നും കോടതി പറഞ്ഞു.

പാലക്കാട് സ്വദേശി പിതാവിനെ കൊലപ്പെടുത്തിയ കേസിലാണ് ജീവപര്യന്തം തടവിന് ശിക്ഷിച്ചത്. പരോൾ അനുവദിക്കണമെന്ന അപേക്ഷ ജയിൽ അധികൃതർ തള്ളിയതിനെത്തുടർന്ന് തടവുകാരന്റെ ഭാര്യ ഹൈക്കോടതിയെ സമീപിക്കുകയായിരുന്നു.