കൊല്ലത്ത് പത്തുവയസ്സുകാരന് ഗുരുതരമായി പൊള്ളലേറ്റ സംഭവം: അച്ഛൻ പൊള്ളിച്ചതെന്ന് കുട്ടി, നിഷേധിച്ച് ബന്ധുക്കൾ; ദുരൂഹതയേറുന്നു

​കൊല്ലം : മൈനാഗപ്പള്ളിയിൽ പത്തുവയസ്സുകാരന് ശരീരമാസകലം ഗുരുതരമായി പൊള്ളലേറ്റ സംഭവത്തിൽ ദുരൂഹതയേറുന്നു. സ്വന്തം പിതാവാണ് തന്നെ ക്രൂരമായി പൊള്ളിച്ചതെന്ന് കുട്ടി ഡോക്ടർക്ക് രഹസ്യ മൊഴി നൽകിയതോടെയാണ് നടുക്കുന്ന വിവരം പുറത്തറിയുന്നത്. എന്നാൽ കുട്ടിയുടെ മൊഴി പൂർണ്ണമായും തള്ളി ബന്ധുക്കൾ രംഗത്തെത്തിയിട്ടുണ്ട്. കുട്ടിയുടെ ദേഹത്ത് അബദ്ധത്തിൽ കഞ്ഞിവെള്ളം വീണതാണെന്നും സംഭവസമയത്ത് പിതാവ് സ്ഥലത്തുണ്ടായിരുന്നില്ലെന്നുമാണ് ബന്ധുക്കളുടെ വാദം.

​മൂന്നുദിവസം മുൻപാണ് മൈനാഗപ്പള്ളി സ്വദേശിയായ പത്തുവയസ്സുകാരന് പൊള്ളലേൽക്കുന്നത്. കുട്ടിയുടെ പുറത്തും കാലിലുമടക്കം ശരീരത്തിന്റെ പല ഭാഗങ്ങളിലും ഗുരുതരമായി പൊള്ളലേറ്റിട്ടുണ്ട്. ഇന്ന് ആശുപത്രിയിൽ മരുന്ന് വയ്ക്കുന്നതിനായി എത്തിയപ്പോഴാണ് സംഭവത്തിലെ ക്രൂരത പുറംലോകം അറിയുന്നത്. കുട്ടിയുടെ പരിക്കുകളിൽ കടുത്ത സംശയം തോന്നിയ ഡ്യൂട്ടി ഡോക്ടർ കുട്ടിയോട് രഹസ്യമായി കാര്യങ്ങൾ ചോദിച്ചറിയുകയായിരുന്നു. ഈ സമയത്താണ് അച്ഛനാണ് തന്നെ പൊള്ളിച്ചതെന്ന ക്രൂരമായ സത്യം കുട്ടി ഡോക്ടറോട് വെളിപ്പെടുത്തിയത്.

​കുട്ടിയുടെ ഞെട്ടിക്കുന്ന വെളിപ്പെടുത്തലിന് പിന്നാലെ ഡോക്ടർ ഉടൻ തന്നെ പോലീസിൽ വിവരമറിയിക്കുകയായിരുന്നു. തുടർന്ന് വിദഗ്ധ ചികിത്സയ്ക്കായി കുട്ടിയെ കൊല്ലം ജില്ലാ ആശുപത്രിയിലേക്ക് മാറ്റിയിരിക്കുകയാണ്. അതേസമയം, ചികിൽസിക്കുന്ന ഡോക്ടറുടെ സംശയങ്ങളും കുട്ടിയുടെ മൊഴിയും ബന്ധുക്കൾ പൂർണ്ണമായും നിഷേധിക്കുകയാണ്. കഞ്ഞിവെള്ളം വീണാണ് അപകടം ഉണ്ടായതെന്ന് ഇവർ ആവർത്തിക്കുമ്പോഴും, കുട്ടിയുടെ പുറത്തും ശരീരത്തിന്റെ മറ്റ് ഭാഗങ്ങളിലും ഇത്രത്തോളം ആഴത്തിൽ പൊള്ളലേറ്റത് എങ്ങനെയാണെന്ന കാര്യത്തിൽ വലിയ ദുരൂഹത നിലനിൽക്കുന്നുണ്ട്. സംഭവത്തിൽ ചൈൽഡ് ലൈനും പോലീസും സംയുക്തമായി വിശദമായ അന്വേഷണം ആരംഭിച്ചിട്ടുണ്ട്. അടിയന്തരമായി പിതാവിനെ ചോദ്യം ചെയ്യാനാണ് പോലീസിന്റെ തീരുമാനം.