.jpg)
കാലവസ്ഥയില് മാറ്റം വന്നതോടെ പല പ്രദേശങ്ങളിലും ഡെങ്കിപ്പനി (Dengue fever) വ്യാപകമായി കൊണ്ടിരിക്കുകയാണ്. ഈഡിസ് ഈജിപ്റ്റെ കൊതുകളില് നിന്ന് പകരുന്ന വൈറസ് രോഗമാണിത്. മഴക്കാലമാകുന്നതോടെ ഡെങ്കിപ്പനി ബാധിക്കുന്നവരുടെ എണ്ണവും വളരെയധികം കൂടാറുണ്ട്. ഇന്ത്യയില് ഡെങ്കിപ്പനി ബാധിക്കുന്നവരുടെ എണ്ണം വര്ധിച്ചതായാണ് കണക്കുകള് സൂചിപ്പിക്കുന്നത്.
രോഗത്തിന്റെ തുടക്കത്തില് പ്ലേറ്റ്ലെറ്റുകള് കുറയില്ലെങ്കിലും പതുക്കെ പതുക്കെ ഗണ്യമായ കുറവിലേക്ക് നയിക്കും. അതികഠിനമായ തലവേദനയും പനിയും ശരീരവേദനയുമൊക്കെ ആണ് ഈ രോഗത്തിന്റെ ലക്ഷണങ്ങള്. കൃത്യ സമയത്ത് ചികിത്സ ലഭിച്ചില്ലെങ്കില് ജീവന് വരെ അപകടത്തിലാകാനുള്ള സാധ്യതയും വളരെ കൂടുതലാണ്.
ശുദ്ധജലത്തില് വളരുന്ന ഈഡിസ് കൊതുകുകളാണ് ഡെങ്കിപ്പനി പരത്തുന്നത്. പകല് സമയത്താണ് ഇവ മനുഷ്യരെ കടിക്കുന്നത്. രോഗാണു ശരീരത്തില് പ്രവേശിച്ചാല് 2-7 ദിവസങ്ങള്ക്കകം രോഗലക്ഷണങ്ങള് പ്രത്യക്ഷപ്പെടുന്നു. നാലുതരം അണുക്കളാണ് ഡെങ്കിപ്പനി പരത്തുന്നത്. ഡെങ്കിപ്പനിക്ക് മൂന്നുതരം രോഗലക്ഷണങ്ങള് ഉണ്ടാക്കാറുണ്ട്.
സാധാരണ ഡെങ്കിപ്പനി (ക്ലാസിക് ഡെങ്കി ഫീവര്),
രക്തസ്രാവത്തോടെയുള്ള ഡെങ്കിപ്പനി (ഡെങ്കി ഹെമറേജിക് ഫീവര്),
ആഘാതാവസ്ഥയോടുകൂടിയ ഡെങ്കിപ്പനി (ഡെങ്കി ഷോക്ക് സിന്ഡ്രോം)
എന്നിങ്ങനെയാണ് ഡെങ്കിപ്പനിയെ തരംതിരിച്ചിട്ടുള്ളത്. ഡെങ്കിപ്പനി ബാധിച്ച രോഗിയില് നിന്നും ഈഡിസ് ഇനത്തില്പ്പെട്ട പെണ്കൊതുകുകള് രക്തം കുടിക്കുന്നതോടെ രോഗാണുക്കളായ വൈറസുകള് കൊതുകിനുള്ളില് കടക്കുന്നു. 8-10 ദിവസങ്ങള്ക്കുള്ളില് വൈറസുകള് കൊതുകിന്റെ ഉമിനീര് ഗ്രന്ഥിയില് പ്രവേശിക്കുന്നു. ഈ കൊതുകുകള് ആരോഗ്യമുള്ള ഒരാളിന്റെ രക്തം കുടിക്കുന്നതോടൊപ്പം രോഗാണുക്കളെ മുറിവിലൂടെ ശരീരത്തിനുള്ളില് പ്രവേശിപ്പിക്കുകയും ചെയ്യുന്നു. രോഗാണുക്കള് മനുഷ്യശരീരത്തില് എത്തി 3-14 ദിവസം കഴിയുമ്പോള് (ശരാശരി 3-4 ദിവസം) രോഗലക്ഷണങ്ങള് കണ്ടുതുടങ്ങുന്നു.
രോഗത്തിന്റെ ലക്ഷണങ്ങള്
പനിയാണ് പകര്ച്ചവ്യാധികളിലെ പ്രധാന ലക്ഷണം കോവിഡിനും ഡെങ്കിപ്പനിക്കുമൊക്കെ ഈ ലക്ഷണങ്ങള് തന്നെയാണ് പ്രധാനമായും ഉണ്ടാകുന്നത്. ഡെങ്കിപ്പനി വൈറസ് ശരീരത്തില് കയറിയാല് അഞ്ച് മുതല് എട്ട് ദിവസം എടുത്താണ് രോഗം പുറത്തേക്ക് വരുന്നത്. താഴെ പറയുന്നവയായിരിക്കും ഇതിന്റെ പ്രധാന ലക്ഷണങ്ങള്
അതി തീവ്രമായ പനി- 104 ഡിഗ്രി വരെ പനിയാകാം
കടുത്ത തലവേദന
കണ്ണുകള്ക്ക് പിന്നില് വേദന
കടുത്ത ശരീരവേദന
തൊലിപ്പുറത്ത് ചുവന്ന പാടുകള്
ഛര്ദിയും ഓക്കാനാവും
രോഗവ്യാപനം എങ്ങനെ തടയാം
കൃത്യമായ ശ്രദ്ധയുണ്ടെങ്കില് ഡെങ്കിപ്പനി രോഗ വ്യാപനം തടയാന് സാധിക്കും. വീട് പരിസരവും വ്യത്തിയായി സൂക്ഷിക്കുക എന്നതാണ് ഏറ്റവും പ്രധാനം. ഇതു കൂടാതെ താഴെ പറയുന്ന കാര്യങ്ങളും ശ്രദ്ധിക്കണം
രോഗം ബാധിച്ചവരെ കൊതുക് വലയ്ക്കുള്ളില് കിടത്തുക.
സമഗ്രമായ കൊതുക് നശീകരണം വളരെ അത്യാവശ്യമാണ്
വെള്ളം കെട്ടി നില്ക്കുന്നത് പരമാവധി ഒഴിവാക്കാന് ശ്രമിക്കുക
കൊതുക് കടിയേല്ക്കാതിരിക്കാന് ആരോഗ്യകരമായ ക്രീമുകള് പുരട്ടുക
സ്വയം ചികിത്സ വേണ്ട
ഡെങ്കിപ്പനിയുടെ ലക്ഷണങ്ങള് കണ്ടാല് ഉടന് തന്നെ ഡോക്ടറുടെ അടുത്ത് ചികിത്സ തേടണം. സ്വയം ചികിത്സകള് ഒരിക്കലും രോഗം മാറാന് സഹായിക്കില്ല. നിര്ജ്ജലീകരണം ഒഴിവാക്കാന് ധാരാളം വെള്ളം കുടിക്കാന് മറക്കരുത്. പഴങ്ങള് കഴിക്കാനും പഴച്ചാറുകള് കുടിക്കാനും ശ്രദ്ധിക്കണം. പ്ലേറ്റ്ലെറ്റുകള് താഴ്ന്ന പോകാതെ ശ്രദ്ധിക്കേണ്ടതും വളരെ അത്യാവശ്യമാണ്.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
0 Comments