ഏക സിവിൽ കോഡിനെതിരെ കോണ്‍ഗ്രസ് പ്രക്ഷോഭത്തിലേക്ക്; തെരുവിലിറങ്ങും]

തിരുവനന്തപുരം : ഏക സിവില്‍ കോഡിനെ ശക്തമായി എതിര്‍ക്കുമെന്ന് കോണ്‍ഗ്രസ്. ഏക സിവിൽ കോഡിനെതിരെ തെരുവിലിറങ്ങി പ്രക്ഷോഭം നടത്താനാണ് തീരുമാനം. നേതൃയോഗത്തിലാണ് ഇത് സംബന്ധിച്ച് അന്തിമ തീരുമാനമായത്. കെപിസിസി നേതൃയോഗം ബുധനാഴ്ച ചേരാനിരിക്കെയാണ് കോൺ​ഗ്രസ് നിലപാട് വ്യക്തമാക്കിയത്.

എംപിമാര്‍, എംഎല്‍എമാര്‍, ഡിസിസി പ്രസിഡന്റുമാര്‍, പോഷകസംഘടന അദ്ധ്യക്ഷന്മാർ തുടങ്ങിയവര്‍ ബുധനാഴ്ച നടക്കാനിരിക്കുന്ന യോ​ഗത്തിൽ പങ്കെടുത്തേക്കും. എല്ലാ ജനവിഭാഗങ്ങളെയും അണിനിരത്തിയുള്ള പോരാട്ടത്തിന് കോണ്‍ഗ്രസ് നേതൃയോഗം രൂപം കൊടുക്കുമെന്ന് കെപിസിസി പ്രസിഡന്റ് കെ സുധാകരന്‍ പറഞ്ഞു.

ഏക സിവിൽ കോഡിൽ കോൺ​ഗ്രസിൽ ഭിന്നസ്വരമാണ് ഉയർന്നിരുന്നത്. വിഷയത്തിൽ ഹൈക്കമാൻഡ് തീരുമാനം അറിയിക്കട്ടെ എന്നായിരുന്നു സുധാകരന്റെ നിലപാട്. എന്നാൽ ഏക സിവിൽ കോഡ് നടപ്പാക്കരുതെന്നാണ് പ്രതിപക്ഷ നേതാവ് വിഡി സതീശൻ പറഞ്ഞിരുന്നത്. കോൺ​ഗ്രസ് നിലപാട് വ്യക്തമാക്കാത്തതിൽ വിമർശനങ്ങൾ ഉയർന്നതോടെയാണ് തെരുവിലിറങ്ങിയുളള പ്രക്ഷോഭത്തിന് തീരുമാനമായത്. ഏക സിവിൽ കോഡിനെതിരെയുളള സിപിഐഎമ്മിന്റെ സെമിനാറിലേക്ക് കോൺ​ഗ്രസിനെ മാത്രം ക്ഷണിച്ചിരുന്നില്ല. മുസ്ലിം ലീ​ഗിനെ ക്ഷണിച്ചത് ജനറൽ സെക്രട്ടറി പിഎംഎ സലാം സ്വാ​ഗതം ചെയ്തെങ്കിലും സിപിഐഎമ്മിന്റേത് ആത്മാർത്ഥതയില്ലാത്ത നിലപാടാണെന്ന് എം കെ മുനീർ വിമർശിച്ചിരുന്നു.