അഞ്ചാലുംമൂട് പോലീസ് സ്റ്റേഷനിലെ ഗ്രേഡ് എസ്.ഐക്ക് സ്ഥലംമാറ്റം!, 25000 കൈക്കൂലിയായി ആവശ്യപ്പെട്ടത് ബൈപ്പാസിലെ അപകടത്തിൽ പിഞ്ചു കുഞ്ഞുൾപ്പെടെ രണ്ട് പേർ മരിച്ച കുടുംബത്തോട്, അര ലക്ഷത്തിലധികം ശമ്പളം വാങ്ങിയിട്ടും കൊതി അന്യൻ്റെ കാൽലക്ഷത്തോട്, ജില്ലാ പോലീസ് മേധാവി ഇടപ്പെട്ടതോടെ സർവ്വീസ് ബുക്കിൽ വീഴുക വലിയൊരു ബ്ലാക്ക് മാർക്ക്, ആൻ്റണിക്കെതിരെ സമാന പരാതികൾ നിലവിലുള്ളതായി റിപ്പോർട്ട്

അപകടം സംബന്ധിച്ച കേസിന്റെ അന്വേഷണ ഉദ്യോഗസ്ഥനായിരുന്നു ഗ്രേഡ് എസ്ഐ ആന്റണി. പോസ്റ്റ്മോർട്ടം റിപ്പോർട്ടിന്റെയും കേസ് ഫയലിന്റെയും പകർപ്പുകൾക്കും മറ്റുമായി ഡോക്ടറുടെ മകനും ബന്ധുക്കളും എത്തിയതോടെയാണ് എസ്ഐ കൈക്കൂലി ആവശ്യപ്പെട്ടത്. ഇൻഷുറൻസ് കേസ് വിധി വരുമ്പോൾ കോടിക്കണക്കിനു രൂപ കിട്ടുമെന്നും അതിനാൽ 25,000 രൂപ കൈക്കൂലി വേണമെന്നും പറഞ്ഞു. അതല്ലാതെ രേഖകൾ ലഭിക്കാൻ കാലതാമസം നേരിടുമെന്നും പറഞ്ഞു.ഡോക്ടറുടെ കുടുംബത്തിനൊപ്പം എത്തിയ അഭിഭാഷകന്റെ ഇടപെടലിനൊടുവിൽ 10,000 രൂപ നൽകിയശേഷമാണു കേസ് രേഖകളുടെ പകർപ്പു ലഭിച്ചത്. ബാക്കി തുക പിന്നീടു നൽകണമെന്നും ഗ്രേഡ് എസ്ഐ ആവശ്യപ്പെട്ടു. ഈ തുക ലഭിക്കാനായി അഭിഭാഷകനെ നിരന്തരം ഫോണിൽ വിളിക്കുകയും ചെയ്തു.

പിഞ്ചുകുഞ്ഞ് അടക്കം 2 പേരുടെ ജീവൻ നഷ്ടപ്പെട്ട ദുഃഖത്തിൽ കഴിയുന്ന കുടുംബത്തോട് ദയയില്ലാതെ കൈക്കൂലി ചോദിച്ചു വാങ്ങിയ ഗ്രേഡ് എസ്ഐയ്ക്കെതിരെ പൊലീസുകാർക്കിടയിൽ തന്നെ അമർഷം ഉടലെടുത്തിരുന്നു. വിവരം സിറ്റി പൊലീസ് കമ്മിഷണർ ഓഫിസിലെത്തുകയും ചെയ്തു. തുടർന്ന് കമ്മിഷണർ ഡോക്ടറുടെ കുടുംബത്തിന്റെ മൊഴി രേഖപ്പെടുത്തുകയും കേസ് അന്വേഷണത്തിന് നിർദേശം നൽകുകയും ചെയ്തു. അഞ്ചാലുംമൂട് സ്റ്റേഷനിൽ മാസങ്ങൾക്ക് മുൻപാണ് ഗ്രേഡ് എസ്ഐ ആയി ആന്റണി ചുമതലയേറ്റെടുക്കുന്നത്. സമാനമായ ഒട്ടേറെ പരാതികൾ ഗ്രേഡ് എസ്ഐക്കെതിരെ ഉണ്ടെന്നും പറയുന്നു.