ഈ സീസണിൻ്റെ അവസാന പാദത്തോടെ ഇന്റർ മിലാൻ വിടാനൊരുങ്ങി ചിലി ഇൻ്റർനാഷണൽ അലക്സിസ് സാഞ്ചസ്. അടുത്ത മാസത്തോടെ അവസാനിക്കുന്ന കരാർ ഇതുവരെയും പുതുക്കിയിരുന്നില്ല. ഇതോടെ താരം ഫ്രീ ഏജന്റായാകും ക്ലബ് വിടുക. 2021-22 സീസണിൻ്റെ അവസാനത്തിൽ ഇൻ്റർ വിട്ട് മാർസെയിലിലേക്ക് പോയ സാഞ്ചസ്, 2024 വരെ കരാർ ഒപ്പിട്ട് ഫ്രീ ട്രാൻസ്ഫറിലൂടെയാണ് വീണ്ടും ഇന്റർ മിലാനിൽ ചേക്കേറിയത്.
സാഞ്ചസ് ഇന്റർ മിലാനൊപ്പം ലീഗ് കിരീടം നേടുകയും ചെയ്തു. ഈ സീസണിൽ 20ൽ അധികം മത്സരങ്ങൾ സാഞ്ചസ് ഇന്ററിനായി കളിച്ചിരുന്നു. ആദ്യ സ്പെല്ലിൽ ഇന്ററിനൊപ്പം സീരി എ കിരീടം ഉൾപ്പെടെ മൂന്ന് കിരീടങ്ങൾ നേടുകയും ചെയ്തിട്ടുള്ള സാഞ്ചസ് മുമ്പ് ആഴ്സണൽ, ബാഴ്സലോണ, മാഞ്ചസ്റ്റർ യുണൈറ്റഡ് എന്നീ മുൻനിര ക്ലബുകൾക്കായെല്ലാം ജേഴ്സി അണിഞ്ഞിട്ടുണ്ട്. ഇന്റർ മിലാനായി നേരത്തെ മൂന്ന് വർഷത്തിനിടയിൽ നൂറോളം മത്സരങ്ങൾ സാഞ്ചസ് കളിച്ചിരുന്നു.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
0 Comments