കൊല്ലം നഗരത്തെ കയ്യടക്കി തെരുവ് നായ്ക്കൾ!, പിടിച്ചുകൊണ്ടുപോകുന്ന നായ്ക്കളെ തോന്നിയ സ്ഥലത്ത് ഉപേക്ഷിക്കുന്നത് പതിവാകുന്നതായി പ്രദേശവാസികൾ, രാത്രി സമയങ്ങളിൽ വണ്ടിക്ക് കുറുകെ ചാടിയും കാൽനട യാത്രക്കാരെ ഭയപ്പെടുത്തിയും വിനോദം കണ്ടെത്തി നായ്ക്കൾ, അപ്പോഴും കോർപ്പറേഷന് മൗനം തന്നെ

കൊല്ലം : ജില്ലയിൽ മൃഗങ്ങളുടെ ജനന നിയന്ത്രണം പാളിയതിൻ്റെ നേർ ചിത്രമായി നഗരത്തിൽ തെരുവുനായ ശല്യം അതി​രൂക്ഷം. നേരത്തെ രാത്രികാലങ്ങളിൽ മാത്രം തെരുവുനായകളെ പേടിച്ചിരുന്ന പ്രദേശങ്ങളിൽ ഇപ്പോൾ പകൽസമയത്ത് പോലും ജനങ്ങളെ ഈ നായ സംഘങ്ങൾ എത്തി ഭീതിയിലാക്കുന്നുണ്ട്. വേനൽ കടുത്തതി​ന്റെ അസ്വസ്ഥതയും വേണ്ടത്ര ഭക്ഷണം കി​ട്ടാത്തതും മൂല​മാണ് തെരുവുനായകൾ മനുഷ്യനെ ആക്രമിക്കുന്ന നിലയിലേക്ക് എത്തിയതെന്ന് വിദഗ്ധർ അഭിപ്രായപ്പെടുന്നു. ആശ്രാമം മൈതാനത്തും കൊല്ലം ബീച്ചിലും മറിച്ചല്ല കാഴ്ചകൾ. വ്യായാമത്തി​ന് പോകുന്നവരും രാവിലെ പത്രം, പാൽ വിതരണത്തിന് എത്തുന്നവരും ആണ് തെരുവുനായ്ക്കളുടെ പ്രധാന ഇരകൾ. രാവിലെ ആരാധനാലയങ്ങളി​ലേക്ക് പോകുന്നവരുടെ സ്ഥിതിയും ഇതിൽ നിന്ന് വിപരീതമല്ല. റോഡിൽ രാത്രി സമയങ്ങളിൽ വണ്ടിക്ക് കുറുകെ ചാടിയും വഴിനടയാത്രക്കാരെ ഭയപ്പെടുത്തിയും തെരുവുനായ്ക്കൾ ഉണ്ടാക്കുന്ന പുലിവാല് ചില്ലറയല്ല. ഇവയെ പേടിച്ച് പകൽസമയത്ത് പോലും ജനങ്ങൾക്ക് വഴി നടക്കാൻ കഴിയാത്ത സ്ഥിതിയാണി​പ്പോൾ.

മൃഗങ്ങളുടെ ജനന നിയന്ത്രണം യഥാവിധി നടപ്പിലാക്കുക എന്ന ലക്ഷ്യത്തോടെ ആരംഭിച്ച പദ്ധതിയാണ് എബിസി പദ്ധതി. എന്നാൽ കാര്യക്ഷമമായ മേൽനോട്ടം ഇല്ലാത്തതിനാൽ ഈ പദ്ധതിയുടെ പ്രവർത്തനങ്ങൾ അപ്പാടെ പാളുകയാണ്. പ്രദേശത്ത് നിന്ന് പിടിച്ചുകൊണ്ടുവന്ന നായയെ വന്ധീകരിക്കുകയും ശേഷം ആരോഗ്യനില തൃപ്തികരമാകുന്ന മുറക്ക് എവിടെ നിന്നാണോ ഈ നായയെ പിടിച്ചുകൊണ്ടുവന്നത് അവിടേക്ക് തന്നെ നായയെ എത്തിക്കുന്നതാണ് പദ്ധതിയുടെ പ്രധാന ആശയം. ജില്ലയിൽ ഇതിന് വിഭിന്നമായാണ് കാര്യങ്ങൾ നടക്കുന്നത്. ഈ പദ്ധതി പ്രകാരം പിടിച്ചുകൊണ്ടുപോകുന്ന നായയെ ബന്ധപ്പെട്ട ജീവനക്കാർ യഥേഷ്ടം ഉപേക്ഷിക്കുകയാണ്. ഇത്തരത്തിൽ എ.ബി.സി പദ്ധതി പ്രകാരം പിടിച്ചുകൊണ്ടു പോകുന്ന നായ്ക്കളെ ആശ്രാമം മൈതാനത്ത് ഉപേക്ഷിക്കുന്നതായും ആക്ഷേപമുണ്ട്.