മുംബൈ : പ്രശസ്ത സംവിധായകനും ഛായാഗ്രാഹകനുമായ സംഗീത് ശിവന് അന്തരിച്ചു. മുംബൈയിലെ സ്വകാര്യ ആശുപത്രിയിലായിരുന്നു അന്ത്യം. യോദ്ധ, ഗാന്ധര്വം, നിര്ണയം, വ്യൂഹം എന്നീ ചിത്രങ്ങളുടെ സംവിധായകനായ സംഗീത് ശിവന് ഹിന്ദിയില് ഇരുപതോളം ചിത്രങ്ങള് സംവിധാനം ചെയ്തിട്ടുണ്ട്.
രഘുവരന് നായകനായ വ്യൂഹം എന്ന ചിത്രത്തിലൂടെയാണ് (1990) സംവിധായകനായി അരങ്ങേറിയത്. 1997 ല് സണ്ണി ഡിയോള് നായകനായ ‘സോര്’ എന്ന സിനിമയിലൂടെ ബോളിവുഡില് തുടക്കം. സന്ധ്യ, ചുരാലിയാ ഹേ തുംനേ, ക്യാ കൂള് ഹേ തും, അപ്ന സപ്ന മണി മണി, ഏക്ദ് പവര് ഓഫ് വണ്, ക്ലിക്ക്, യാംല പഗ്ല ദീവാന 2 എന്നീ ഹിന്ദി ചിത്രങ്ങള് സംവിധാനം ചെയ്തു.
മലയാളത്തില് ഇഡിയറ്റ്സ്, ഇ എന്ന ചിത്രങ്ങള് നിര്മ്മിക്കുകയും ചെയ്തിരുന്നു. പ്രമുഖ സ്റ്റില് ഫോട്ടോഗ്രാഫറും ഛായഗ്രാഹകനുമായ ശിവന്റെ മകനായി 1959 ലാണ് സംഗീത് ശിവന് ജനിച്ചത്. ഛായാഗ്രാഹകനും സംവിധായകനുമായ സന്തോഷ് ശിവന്, സംവിധായകന് സഞ്ജീവ് ശിവന് എന്നിവര് സഹോദരങ്ങളാണ്.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
0 Comments