പൊലീസ് അക്കാദമിയിലെ ലൈംഗികാതിക്രമ പരാതിയിൽ നടുക്കം!, കടന്നുപിടിക്കുകയും ലൈംഗികാതിക്രമത്തിന് ശ്രമിക്കുകയും ചെയ്തതായി പരാതി നൽകിയത് ഹെഡ് കോണ്‍സ്റ്റബിള്‍ റാങ്കിലുള്ള ഉദ്യോഗസ്ഥ, ആഭ്യന്തര അന്വേഷണ റിപ്പോർട്ടിന് പിന്നാലെ ഓഫീസർ കമാൻഡന്റിന് സസ്പെൻഷൻ

തൃശൂർ : പൊലീസ് അക്കാദമിയിൽ വനിതാ ഉദ്യോ​ഗസ്ഥയുടെ ലൈം​ഗികാതിക്രമ പരാതിയെ തുടർന്ന് ഓഫീസർ കമാൻഡന്റിന് സസ്പെൻഷൻ. ഓഫീസർ കമാൻഡന്റ് പ്രേമൻ കടന്നപ്പള്ളിയെയാണ് സസ്പെൻഡ് ചെയ്തത്. ആഭ്യന്തര അന്വേഷണ റിപ്പോർട്ടിന്റെ അടിസ്ഥാനത്തിലാണ് നടപടി. ഇത് സംബന്ധിച്ച് ഡ‍യറക്ടർ ഉത്തരവിറക്കിയിട്ടുണ്ട്.

രാമവർമ്മപുരത്തെ പൊലീസ് അക്കാദമിയിലെ വനിതാ ഉദ്യോ​ഗസ്ഥയ്‌ക്ക് നേരെയാണ് ലൈംഗികാതിക്രമം നടന്നത്. ഓഫീസർ കമാൻഡന്റ് പ്രേമൻ കടന്നപ്പള്ളിക്കെതിരെയാണ് യുവതി പരാതി നൽകിയത്. സംഭവത്തില്‍ ഹെഡ് കോണ്‍സ്റ്റബിള്‍ റാങ്കിലുള്ള വനിതാ ഉദ്യോഗസ്ഥ അക്കാദമി ഡയറക്ടര്‍ക്ക് രേഖാമൂലം പരാതി നല്‍കിയിരുന്നു. ഓഫീസിൽ വിളിച്ചു വരുത്തിയാണ് അതിക്രമം നടത്തിയതെന്ന് പരാതിയിൽ പറയുന്നുണ്ട്.

ഈ മാസം 17-നാണ് ഉദ്യോഗസ്ഥനില്‍ നിന്ന് ആദ്യമായി അതിക്രമം നേരിട്ടത്. ചില രേഖകള്‍ പ്രിന്റെടുക്കാനുണ്ടെന്ന് പറഞ്ഞാണ് ഉദ്യോഗസ്ഥന്‍ ഓഫീസിലേക്ക് വിളിച്ചുവരുത്തിയതെന്നും അവിടെ വച്ച് കടന്നുപിടിക്കുകയും ലൈംഗികാതിക്രമത്തിന് ശ്രമിക്കുകയും ചെയ്തെന്ന് വനിതാ ഉദ്യോ​ഗസ്ഥ പരാതിയിൽ പറയുന്നു.