കൊല്ലത്ത് ഹാഷിഷ് ഓയിൽ പിടികൂടിയ കേസ്!, രണ്ടാം പ്രതി കോട്ടയത്തുണ്ടെന്ന വിവരത്തിൻ്റെ അടിസ്ഥാനത്തിൽ അവിടെ പോയി പൊക്കി പോലീസ്, പിടിയിലായ 29-കാരൻ ഒട്ടേറെ കേസുകളിലെ പ്രതി

കൊല്ലം : ചടയമംഗലത്ത് ഹാഷിഷ് ഓയിൽ പിടികൂടിയ കേസിലെ രണ്ടാം പ്രതിയെയും ചടയമംഗലം പോലീസ് അറസ്റ്റ് ചെയ്തു. കോട്ടയം വാകത്താനം കടുവാക്കുഴിയിൽ വീട്ടിൽ അരുൺ (29) ആണ് പിടിയിലായത്. കഴിഞ്ഞ മാർച്ച് 23-ന് 250 ഗ്രാം ഹാഷിഷ് ഓയിലുമായി നിലമേലിനുസമീപം കടയ്ക്കൽ റോഡിൽ െവച്ച് ഒന്നാം പ്രതി നിസാമുദ്ദീനെ പോലീസ് പിടികൂടിയിരുന്നു. നിലമേലിൽ ഹാഷിഷ് ഒായിൽ എത്തിച്ച് തിരിച്ചുവരുമ്പോൾ 30,000 രൂപ കിട്ടുമെന്ന എഗ്രിമെന്റ് പ്രകാരമാണ് ഒന്നാംപ്രതി നിലമേലിൽ എത്തിയത്. ആർക്കാണ് കൊടുക്കേണ്ടത് എന്ന് അരുൺ പറഞ്ഞിരുന്നില്ല എന്നാണ് നിസാമുദ്ദീൻ പോലീസിനോടു പറഞ്ഞത്.

ഇയാൾ കോട്ടയത്തുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് വാകത്താനത്തുനിന്നു യുവാവിനെ കസ്റ്റഡിയിലെടുത്തത്. കൊല്ലം റൂറൽ സൈബർ സെല്ലിന്റെ സഹായത്തോടെ ടവർ ലൊക്കേഷൻ മനസ്സിലാക്കിയാണ് പ്രതിയെ പിടികൂടിയത്. ഇയാൾ ഒട്ടേറെ കേസുകളിലെ പ്രതിയാണ്. നേരത്തേ 65 കിലോഗ്രാം കഞ്ചാവുമായി ഏറ്റുമാനൂർ എക്സൈസ് പിടികൂടി റിമാൻഡ് ചെയ്തിരുന്നു. സാമ്പത്തിക തട്ടിപ്പ് കേസി ലും ഉൾപ്പെട്ടിട്ടുണ്ട്. ചടയമംഗലം എസ്.ഐ. മനോജ്, സി.പി.ഒ.മാരായ ജംഷാദ്, ഉല്ലാസ്, അജിത്ത് എന്നിവരടങ്ങുന്ന സംഘമാണ് പിടികൂടിയത്. പ്രതിയെ റിമാൻഡ് ചെയ്തു.