കൊല്ലം സ്വദേശി സൗദിയിൽ ജീവനൊടുക്കി!, ആത്മഹത്യ മനോവിഷമം മൂലമെന്ന് സൂചന

കൊല്ലം : മലയാളിയായ യുവാവ് സൗദിയിൽ ജീവനൊടുക്കിയതായി കുടുംബത്തിന് വിവരം. കടയ്ക്കൽ കാറ്റാടിമൂട് സ്വദേശി കൊച്ചനി എന്ന് വിളിക്കുന്ന ഷാജി കുമാറാണ് സൗദി അൽ ക്വാറിൽ ആത്മഹത്യ ചെയ്തത്. നാളെ നാട്ടിലേക്ക് വരാനിരിക്കവേയാണ് ദാരുണ സംഭവം. ഒരുമാസം മുമ്പ്  ഇദ്ദേഹം ഓടിച്ചിരുന്ന വാഹനം മറ്റൊരു വാഹനവുമായി കൂട്ടിയിടിച്ചുണ്ടായ അപകടത്തിൽ സൗദി സ്വദേശി മരണപ്പെട്ടിരുന്നു.

ഏകദേശം 28000 റിയാല് അപകടവുമായി ബന്ധപ്പെട്ട പിഴ ചുമത്തിയിരുന്നതായി പറയപ്പെടുന്നു, സ്പോൺസർ  പിഴ ഒടുക്കാൻ തയ്യാറാകാതിരിക്കുകയും പാസ്പോർട്ട്  പിടിച്ചു വെച്ചതോടെ ഷാജി മാനസ്സിക വിഷമത്തിലായിരുന്നുവെന്നാണ് സൂചന. തുടർന്നാണ് കഴിഞ്ഞ ദിവസം വൈകിട്ടോടെ അദ്ദേഹം ആത്മഹത്യ  ചെയ്തത്. മൃതദേഹം നാട്ടിലേക്ക് കൊണ്ടുവരുന്നതിനുള്ള ശ്രമങ്ങൾ നടന്നുവരുന്നു. മരിച്ച ഷാജിയ്ക്ക് ഭാര്യയും ഒരു മകനുമാണുള്ളത്.