കൈക്കൂലി കേസ് അടക്കം നാണംകെടുത്തുന്ന സംഭവങ്ങൾ!, സംസ്ഥാനത്തെ ഗുണ്ടാ അഴിഞ്ഞാട്ടവും പൊലീസ് ഗുണ്ടാ ബന്ധവും അടക്കം ചർച്ചയ്ക്ക്, പൊലീസ് സേനയിലെ ഉന്നതതല യോഗം ഇന്ന് ചേരുന്നത് സർവ്വത്ര അഴിച്ചുപണിയെന്ന സൂചന നൽകിക്കൊണ്ട്, പോലീസ് മേധാവിയുടെ കാലാവധി നീട്ടുന്നത് ഉൾപ്പെടെ നിര്‍ണ്ണായകമായ ഈ ചര്‍ച്ചകൾക്ക് ശേഷം

തിരുവനന്തപുരം : പൊലീസ് ഉന്നതതല യോഗം ഇന്നു ചേരുന്നത് സർവ്വത്ര അഴിച്ചു പണിയുടെ സൂചനയുമായി. പൊലീസിന്റെ പ്രവർത്തനത്തില്‍ മുഖ്യമന്ത്രിയും ആഭ്യന്തര മന്ത്രിയും കൂടിയായ പിണറായി വിജയൻ തീർത്തും അതൃപ്തിയിലാണ്. സംസ്ഥാനത്തെ ഗുണ്ടാ അഴിഞ്ഞാട്ടവും പൊലീസ് ഗുണ്ടാ ബന്ധവും ഉള്‍പ്പെടെ പൊലീസിനെ വെട്ടിലാക്കുന്ന നിരവധി സംഭവങ്ങളുണ്ട്. ഇതെല്ലാം ചർച്ച ചെയ്യാനാണ് പൊലീസ് ഉന്നത തല യോഗം.

പൊലീസ് മേധാവി ഷെയ്ഖ് ദർവേശ് സാഹിബിന്റെ വിരമിക്കല്‍ മാസമാണ് ഇത്. സർക്കാരിന് ഒരു കൊല്ലം കൂടി കാലാവധി നീട്ടി നല്‍കാനാകും. എന്നാല്‍ ഇതിന് സർക്കാർ തത്വത്തില്‍ തീരുമാനം എടുത്തെങ്കിലും ഔദ്യോഗിക നടപടികള്‍ തുടങ്ങിയില്ല. ഇതിനിടെയാണ് യോഗം.

പൊലീസ് ആസ്ഥാനത്താണു യോഗം. അടുത്തിടെ ഗുണ്ടകള്‍ കേരളത്തില്‍ അഴിഞ്ഞാടിയതും പൊലീസിലെ പലർക്കുമുള്ള ഗുണ്ടാ ബന്ധം പുറത്തു വന്നതും സർക്കാരിനു വലിയ നാണക്കേടായിരുന്നു. ഹൈക്കോടതി കേരള പൊലീസിനെ ഒന്നിലേറെ തവണ വിമർശിച്ചു.

ലഹരി ഉപയോഗ കേസുകള്‍, വസ്തു കയ്യേറ്റ കേസുകള്‍, കൊലപാതകം, കൊലപാതക ശ്രമം, സ്ത്രീകള്‍ക്കെതിരായ അക്രമം, കുട്ടികള്‍ക്കെതിരായ കേസുകള്‍, പട്ടികവിഭാഗത്തിനെതിരായ അക്രമം എന്നിവയും യോഗം ചർച്ച ചെയ്യും. തിരഞ്ഞെടുപ്പു പെരുമാറ്റ ചട്ടം അവസാനിച്ചതോടെ സംസ്ഥാന പൊലീസ് മേധാവി എസ്. ദർവേഷ് സാഹിബാണു ക്രമസമാധാനച്ചുമതലയുള്ള ജില്ലാ പൊലീസ് മേധാവികള്‍ മുതല്‍ എഡിജിപി വരെയുള്ള ഉദ്യോഗസ്ഥരുടെ യോഗം വിളിച്ചത്.

പൊലീസ് ആസ്ഥാനത്തെ ഉന്നതർ, ക്രൈംബ്രാഞ്ച് മേധാവി, ഇന്റലിജൻസ് മേധാവി എന്നിവരും പങ്കെടുക്കും. പൊലീസിലെ അഴിമതിയും ചർച്ചാ വിഷയമാകും.

അതിനിടെ വളപട്ടണം സ്റ്റേഷനിലെ മുഴുവൻ പൊലീസ് ഉദ്യോഗസ്ഥർക്കുമെതിരേ നടപടിയാവശ്യപ്പെട്ട് വിജിലൻസ് റിപ്പോർട്ട് വാർത്തകളിലെത്തി. മെയ്‌ 29-ന് വിജിലൻസ് ഡിവൈ.എസ്‌പി. പി. മധുസൂദനൻ നായരുടെ നേതൃത്വത്തില്‍ നാലംഗസംഘം നടത്തിയ പരിശോധനയില്‍ ക്രമക്കേട് കണ്ടെത്തിയിരുന്നു.

കടവുകളില്‍നിന്ന് പിടിച്ചെടുത്ത മണല്‍ പൊലീസുകാർ തിരിമറി നടത്തിയെന്ന ആരോപണത്തെ തുടർന്നായിരുന്നു റെയ്ഡ്. ഇതേതുടർന്നാണ് നടപടി ശുപാർശ. ഇത്തരം സംഭവങ്ങള്‍ പൊലീസിന് നാണക്കേടാണ്. ഇതെല്ലാം പൊലീസ് ഉന്നത തല യോഗത്തിലും ചർച്ചയാകും.