അഞ്ചാലുംമൂട്ടിൽ ആതിര ബസ് മുന്നോട്ടെടുക്കുന്നതിനിടെ കാലിലൂടെ ടയർ കയറി വയോധികൻ മരിച്ചു!, ആളെ തിരിച്ചറിഞ്ഞതായി പോലീസ്, ബസിന് ഇടയിൽപ്പെട്ട വൃദ്ധനെ രക്ഷിച്ചത് ബി.ജെ.പി.പ്രവർത്തകരും നാട്ടുകാരും ചേർന്ന്, പക്ഷെ ആശുപത്രിയിൽ എത്തിച്ചതിന് പിന്നാലെ മരണം

അഞ്ചാലുംമൂട് : സ്വകാര്യ ബസ് മുന്നോട്ടെടുക്കുന്നതിനിടെ കാൽകുടുങ്ങി വീണ വയോധികൻ ആശുപത്രിയിൽ എത്തിച്ചയുടനെ മരിച്ചു. പെരുംമ്പുഴ മുരിക്കന്നൂർ സുനി ഭവനത്തിൽ രാഘവൻ ഉണ്ണിത്താൻ്റെ മകൻ സുരേന്ദ്രൻ ഉണ്ണിത്താൻ (82) ആണ് ചികിത്സയ്ക്കായി ആശുപത്രിയിൽ എത്തിച്ചയുടനെ മരിച്ചത്. അഞ്ചാലുംമൂട് ജങ്‌ഷനിൽ ഞായറാഴ്ച ഉച്ചയോടെയാണ് സംഭവം. എന്നാൽ ആളെ തിരിച്ചറിഞ്ഞിട്ടില്ലായിരുന്നു.

കൊല്ലം - കുണ്ടറ റൂട്ടിലോടുന്ന ആതിര ബസിന് മുന്നിലാണ് വയോധികൻ അപകടത്തിൽപ്പെട്ടത്. അഞ്ചാലുംമൂട്ടിൽ നിന്ന് കൊല്ലത്തേക്കുവന്ന സ്വകാര്യ ബസ്‌ ജങ്‌ഷനിലെ ബസ് ബേയിൽ നിർത്തി യാത്രക്കാരെ ഇറക്കുകയായിരുന്നു. ഈ സമയം ബസ്‌ബേയിൽ ഇരുന്ന വയോധികൻ റോഡിലേക്ക് ഇറങ്ങിയതുകാണാതെ ബസ് മുന്നോട്ട് എടുത്തപ്പോൾ വയോധികന്റെ കാലിലൂടെ ടയർ കയറുകയായിരുന്നു. 

ഇതേ സമയം സമീപത്തുണ്ടായിരുന്ന ബി.ജെ.പി.പ്രവർത്തകർ ബഹളം വെച്ചതോടെ ബസ് ഡ്രൈവർ സംഭവം ശ്രദ്ധിക്കുന്നത്. ഇതോടെ ബസ് നിർത്തുകയായിരുന്നു. ഇതോടെ വയോധികന്റെ പാദം ബസിനടിയിലും തല മുൻചക്രത്തിന്റെ ആക്‌സിലിൽ ഉടക്കി നിവരാൻ കഴിയാത്ത അവസ്ഥയിലുമായി. ഓടിക്കൂടിയ ബി.ജെ.പി. പ്രവർത്തകരും ബസ് ജീവനക്കാരും ചേർന്ന് ജാക്കിെവച്ച് ബസ് ഉയർത്തി വയോധികനെ പുറത്തെടുത്തു. കാലിന് ഗുരുതര പരിക്കേറ്റ വയോധികനെ അല്പ ബോധത്തോടെ ജില്ലാ ആശുപത്രിയിലെത്തിച്ചെങ്കിലും പിന്നാലെ മരണം സ്ഥിരീകരിക്കുകയായിരുന്നു.