കൊളോണിയൽ കാലഘട്ടത്തിലെ പെരുമാറ്റ രീതി മാറ്റണം!, മറ്റ് സർക്കാർ ഓഫീസുകൾ പോലെ ഭയമില്ലാതെ ജനങ്ങൾക്ക് കയറിച്ചെല്ലാനാകണം, പൊലീസ് മേധാവിക്ക് കർശന നിർദേശം നൽകി ഹൈക്കോടതി

കൊളോണിയൽ കാലഘട്ടത്തിലെ പെരുമാറ്റ രീതി മാറ്റണമെന്ന് പൊലീസിന് നിർദേശം നൽകി ഹൈക്കോടതി. പരിഷ്കൃത കാലഘട്ടത്തിലാണ് പോലീസ് സേനയുള്ളതെന്ന് ഓർമ്മിക്കണമെന്നും സംസ്ഥാന പൊലീസ് മേധാവിയോട് കോടതി പറഞ്ഞു. മറ്റ് സർക്കാർ ഓഫീസുകൾ പോലെ ഭയമില്ലാതെ പൊലീസ് സ്റ്റേഷനിൽ ജനങ്ങൾക്ക് കയറിച്ചെല്ലാനാകണമെന്നും കോടതി നിർദേശിച്ചു.

ആലത്തൂരിൽ കോടതി ഉത്തരവുമായി പൊലീസ് സ്റ്റേഷനിലെത്തിയ അഭിഭാഷകനോട് എസ്ഐ മോശമായി പെരുമാറിയതുമായി ബന്ധപ്പെട്ട വിഷയം പരിഗണിക്കവെയാണ് കോടതി ഇക്കാര്യം പരാമർശിച്ചത്. കോടതി നിർദേശ പ്രകാരം സംസ്ഥാന പൊലീസ് മേധാവി ഓൺലൈനായി കോടതിയിൽ ഹാജരായി. പൊലീസ് സേനയിലെ ഉദ്യോഗസ്ഥർ പൊതുജനങ്ങളോട് മോശമായി പെരുമാറാൻ അനുവദിക്കരുതെന്ന് ഹൈക്കോടതി ഡിജിപിക്ക് കർശന നിർദേശം നൽകി. പെരുമാറ്റം സംബന്ധിച്ച് നിരവധി സർക്കുലറുകൾ ഉണ്ടായിട്ടും ഇത്തരം വീഴ്ചകൾ എന്തുകൊണ്ടാണ് ഉണ്ടാകുന്നതെന്നും കോടതി ചോദിച്ചു.

പൊലീസ് ഉദ്യോഗസ്ഥരെ നിയന്തിക്കാൻ സാധിക്കണം. പുതിയ ഉദ്യോഗസ്ഥർക്ക് ആവശ്യമായ പരിശീലനം നൽകണം. പൊലീസ് സ്റ്റേഷൻ എന്ന് പറഞ്ഞാൽ ഭയം ഉളവാക്കുന്ന സ്ഥലം ആകാൻ പാടില്ല. ഏതൊരു സർക്കാർ ഓഫീസും പോലെ ജനങ്ങൾക്ക് കയറിചെല്ലാനാകണമെന്നും കോടതി പറഞ്ഞു. ബഹുഭൂരിപക്ഷം ഉദ്യോഗസ്ഥരും നല്ല പെരുമാറ്റം കാഴ്ച്ചവയ്ക്കുന്നവരാണെന്നും എന്നാൽ ഇത്തരത്തിലുള്ളവർ എല്ലാ വിഭാഗത്തിലുമുണ്ടാകുമെന്നും ഡി ജിപി പറഞ്ഞു. പൊതുജനങ്ങളോട് മോശമായി പെരുമാറുന്നവർക്കതിരെ കർശന നടനടികൾ സ്വീകരിക്കുമെന്നും ഡിജിപി ഉറപ്പ് നൽകി. അഭിഭാഷകൻ്റെ ഹർജി അടുത്തമാസം എട്ടിന് പരിഗണിക്കും.