അഞ്ചാലുംമൂട്ടിൽ മാലിന്യം തള്ളി ബൈക്കിലെത്തിയ മാന്യൻ...!, ഹെൽമെറ്റ് ധരിച്ചെത്തി വെള്ള കവറിൽ പാക്ക് ചെയ്ത മാലിന്യം തള്ളിയത് ശാസ്തോലി അമ്പല ഭാഗത്ത്, ആരും കണ്ടില്ലെന്നു കരുതിയെങ്കിൽ തെറ്റി എല്ലാം കണ്ടുകൊണ്ട് ഒരാൾ മുകളിൽ ഇരിപ്പുണ്ടായിരുന്നു, സാമൂഹിക വിരുദ്ധൻ്റെ ദൃശ്യങ്ങൾ പുറത്തായി

അഞ്ചാലുംമൂട് : കൊല്ലം കോർപ്പറേഷൻ അഞ്ചാലുംമൂട് ഡിവിഷനിലെ വെട്ടുവിള വാർഡ് ശാസ്തോലി അമ്പല പരിസരത്ത് ജനവാസ മേഖലയിൽ ബൈക്കിൽ എത്തിയ അജ്ഞാത വ്യക്തി മാലിന്യം തള്ളി. തിങ്കളാഴ്ച രാത്രി പത്തുമണിയോടെയാണ് സംഭവം. താന്നിക്കമുക്ക് ഭാഗത്ത് നിന്ന് എത്തിയ അജ്ഞാതൻ സ്വകാര്യ വ്യക്തിയുടെ മതിലിനോട് ചേർന്ന് റോഡ് വക്കിലാണ് വെള്ളക്കവറിൽ പായ്ക്ക് ചെയ്ത് മാലിന്യം നിക്ഷേപിച്ച് അഞ്ചാലുംമൂട് ഭാഗത്തേക്ക് കടന്നു കളഞ്ഞത്. മാലിന്യ നിക്ഷേപകരെ കൊണ്ട് പൊറുതിമുട്ടിയതോടെ പരിസരവാസിയായ സ്ഥാപിച്ച സി.സി.ടി.വി ക്യാമറയിൽ സാമൂഹിക വിരുദ്ധന്റെ ദൃശ്യങ്ങൾ പതിഞ്ഞിട്ടുണ്ട്. സംഭവത്തിൽ ബന്ധപ്പെട്ട അധികാരികൾക്ക് പരാതി നൽകാൻ ഒരുങ്ങുകയാണ് നാട്ടുകാർ. അതേസമയം, ഇവിടെ മാലിന്യം തള്ളുന്നത് തുടർക്കഥയാകുന്നതായി പ്രദേശവാസികൾ പറഞ്ഞു. 

നേരത്തെയും ഇത്തരം പ്രശ്നങ്ങൾ പരാതിയായി അധികൃതരുടെ മുന്നിൽ അവതരിപ്പിച്ചിട്ടുണ്ടെന്ന് പരിസരവാസിയായ മുരളീധരൻ പിള്ള അഷ്ടമുടി ലൈവിനോട് പറഞ്ഞു. പരാതി പറഞ്ഞാലും ആരും തിരിഞ്ഞു നോക്കാത്ത സ്ഥിതിയാണ് അതുകൊണ്ടാണ് ക്യാമറ സ്ഥാപിച്ചത്. ക്യാമറ വെച്ചതിനു പിന്നാലെ കുറച്ചുദിവസം പ്രശ്നങ്ങളില്ലായിരുന്നെങ്കിലും ഇപ്പോൾ വീണ്ടും സ്ഥിരമായി ഈ പരിസരങ്ങളിൽ മാലിന്യം സാമൂഹിക വിരുദ്ധർ നിക്ഷേപിക്കുകയാണ്. ശാശ്വതമായ പരിഹാരം കാണണമെന്നും ദൃശ്യങ്ങളിലുള്ള സാമൂഹികവിരുദ്ധനെ പിടികൂടി മാതൃകാപരമായ ശിക്ഷ നൽകണമെന്നും അദ്ദേഹം പറഞ്ഞു. മഴക്കാലമായതോടെ ഇത്തരം മാലിന്യങ്ങൾ മൂലം കൊതുക് ശല്യം വർദ്ധിച്ചതായും പകർച്ചവ്യാധി ഭീതിയിലാണ് നാട്ടുകാർ എന്നും കുട്ടികളും മറ്റുമുള്ള സ്ഥലമായതിനാൽ ബന്ധപ്പെട്ട അധികൃതർ ഇടപെടണമെന്നും അദ്ദേഹം ആവശ്യപ്പെട്ടു.