ആശങ്ക പ്രകടിപ്പിച്ച് ഉക്രൈൻ!, മോദി - പുടിൻ കൂടിക്കാഴ്ച്ച സമാധാന ശ്രമങ്ങൾക്ക് ഏറ്റ വിനാശകരമായ പ്രഹരം, ഇന്ത്യയുടെ നിലപാട് തീർത്തും നിരാശാജനകമാണെന്ന് സെലൻസ്കി

കൈവ് : പ്രധാനമന്ത്രി നരേന്ദ്ര മോദി റഷ്യൻ പ്രസിഡന്റ് വ്‌ളാഡിമർ പുടിനുമായി മോസ്‌കോയിൽ നടത്തിയ കൂടിക്കാഴ്ച്ചയിൽ ആശങ്ക പ്രകടിപ്പിച്ച്  ഉക്രൈൻ പ്രസിഡന്റ് വോലോഡൈമർ സെലൻസ്‌കി. ലോകത്തിലെ ഏറ്റവും വലിയ ജനാധിപത്യ രാഷ്ട്രത്തിന്റെ നേതാവ് ലോകത്തിലെ ഏറ്റവും രക്തരൂക്ഷിതമായ കുറ്റവാളിയെ മോസ്കോയിൽ വെച്ച് ആലിംഗനം ചെയ്യുന്ന കാഴ്ച്ച സമാധാന ശ്രമങ്ങൾക്ക് മേലുള്ള വിനാശകരമായ പ്രഹരമാണെന്നും ഇന്ത്യയുടെ നിലപാട് തീർത്തും നിരാശാജനകമാണെന്നും സെലൻസ്കി പറഞ്ഞു.  

ഉക്രൈൻ തലസ്ഥാനമായ കൈവിൽ കുട്ടികളുടെ ആശുപത്രിക്ക് നേരെ റഷ്യ നടത്തിയ ആക്രമണം ചൂണ്ടിക്കാട്ടിയായിരുന്നു സെലൻസ്കിയുടെ വിമർശനം. "റഷ്യയുടെ ക്രൂരമായ മിസൈൽ ആക്രമണത്തിന്റെ ഫലമായി ഇന്ന് ഉക്രെയ്നിൽ 37 പേരാണ് കൊല്ലപ്പെട്ടത്, അതിൽ 3 കുട്ടികളും ഉൾപ്പെടും. 13 കുട്ടികളടക്കം 170 പേർക്ക് ആക്രമണത്തിൽ പരിക്കേറ്റു. യുവ കാൻസർ രോഗികളെ ലക്ഷ്യമിട്ട് ഉക്രെയ്നിലെ ഏറ്റവും വലിയ കുട്ടികളുടെ ആശുപത്രിയിലേക്കാണ് റഷ്യൻ മിസൈൽ പതിച്ചത് " സെലൻസ്കി പറഞ്ഞു. 

"ലോകത്തിലെ ഏറ്റവും വലിയ ജനാധിപത്യ രാഷ്ട്രത്തിന്റെ നേതാവ് ലോകത്തിലെ ഏറ്റവും രക്തരൂക്ഷിതമായ കുറ്റവാളിയെ മോസ്കോയിൽ വെച്ച് ആലിംഗനം ചെയ്യുന്നത് കാണുന്നത് വലിയ നിരാശയും സമാധാന ശ്രമങ്ങൾക്ക് വിനാശകരമായ പ്രഹരവുമാണ്," എക്‌സിലെ തന്റെ പോസ്റ്റിൽ സെലൻസ്കി എഴുതി.

തിങ്കളാഴ്ച യുക്രെയ്‌നിലെ അഞ്ച് നഗരങ്ങളിൽ റഷ്യ നടത്തിയ മിസൈൽ ആക്രമണത്തിന് പിന്നാലെയാണ് സെലൻസ്‌കിയുടെ പരാമർശം. കുറഞ്ഞത് 31 പേർ കൊല്ലപ്പെടുകയും രാജ്യത്തെ ഏറ്റവും വലിയ കുട്ടികളുടെ ആശുപത്രിക്കും മറ്റ് കെട്ടിടങ്ങൾക്കും കേടുപാടുകൾ സംഭവിക്കുകയും ചെയ്തതായി എപി റിപ്പോർട്ടിൽ പറയുന്നു. ആശുപത്രിയിൽ പതിച്ച റഷ്യൻ Kh-101 കാലിബർ മിസൈലിന്റെ അവശിഷ്ടങ്ങൾ കണ്ടെത്തിയതായി ഉക്രേനിയൻ സെക്യൂരിറ്റി സർവീസ് അറിയിച്ചു.

രണ്ട് ദിവസത്തെ സന്ദർശനത്തിനായാണ് മോദി മോസ്‌കോയിലെത്തിയത്. ചൊവ്വാഴ്ച ഇന്ത്യൻ പ്രവാസികളെ അഭിസംബോധന ചെയ്ത മോദി റഷ്യയെ "ഇന്ത്യയുടെ എല്ലാ കാലത്തെയും വിശ്വസ്തതയുള്ള സുഹൃത്ത്" എന്ന് വിശേഷിപ്പിച്ചു. ഇരു രാജ്യങ്ങളും തമ്മിലുള്ള പങ്കാളിത്തത്തിനായി പ്രവർത്തിക്കുന്ന പുടിനെയും അദ്ദേഹം പ്രശംസിച്ചു.

തിങ്കളാഴ്ച ഇരുവരും അനൗപചാരിക കൂടിക്കാഴ്ച നടത്തിയിരുന്നു. അവിടെ പ്രധാനമന്ത്രി മോദി ഇരു രാജ്യങ്ങളും തമ്മിലുള്ള സഹകരണ കാര്യങ്ങളിൽ നിരവധി പ്രശ്നങ്ങൾ ഉന്നയിച്ചതായി റിപ്പോർട്ടുണ്ട്. ഇന്ന് നടക്കുന്ന 22-ാമത് ഇന്ത്യ-റഷ്യ വാർഷിക ഉച്ചകോടിയിൽ ഇരു നേതാക്കളും ചർച്ചകൾ നടത്തും.