യുവതിയെ അമ്മിക്കുട്ടികൊണ്ട് അടിച്ചു...!, ക്രൂര മര്‍ദ്ദനം സൗന്ദര്യമില്ലെന്ന് പറഞ്ഞ്, സ്ത്രീധനമായി കൂടുതല്‍ സ്വര്‍ണം ആവശ്യപ്പെട്ടു, ഭര്‍ത്താവിനും ബന്ധുക്കള്‍ക്കുമെതിരെ കേസെടുത്ത് പോലീസ്

കണ്ണൂര്‍ : ചെറുപുഴയില്‍ സൗന്ദര്യമില്ലെന്ന് ആരോപിച്ചും കൂടുതല്‍ സ്വര്‍ണം ആവശ്യപ്പെട്ടും യുവതിയെ അമ്മിക്കുട്ടികൊണ്ട് മര്‍ദിച്ച ഭര്‍ത്താവിന്റെയും ബന്ധുക്കളുടെയും പേരില്‍ കേസെടുത്തു.

അരവന്‍ചാല്‍ ചള്ളച്ചാല്‍ റോഡിലെ ഓലിയന്‍വീട്ടില്‍ രഹ്ന റഹ്മാ(28)നാണ് മര്‍ദ്ദനമേറ്റത്. സംഭവത്തില്‍ ഭര്‍ത്താവ് പാടിയോട്ടുചാലിലെ അനസ്, ബന്ധുക്കളായ റുഖിയ, മൈമൂന എന്നിവര്‍ക്കെതിരെയാണ് കേസെടുത്തത്. 

കഴിഞ്ഞ 29ന് രാത്രി ഒന്‍പതിന് ഒന്നാംനിലയിലെ കിടപ്പുമുറിയില്‍വച്ച് മര്‍ദിച്ചപ്പോള്‍ ഭയന്ന് അടുക്കളയിലേക്ക് ഓടിയ രഹ്നയെ പിന്നാലെ വന്ന് അമ്മിക്കുട്ടികൊണ്ട് വലത് കൈയ്ക്കും നടുവിനും മര്‍ദ്ദിക്കുകയായിരുന്നു. 

2016 മേയിലായിരുന്നു ഇവരുടെ വിവാഹം. ഇതിനിടെ സൗന്ദര്യമില്ലെന്ന് ആക്ഷേപിക്കുകയും കൂടുതല്‍ സ്ത്രീധനം ആവശ്യപ്പെട്ട് പീഡിപ്പിച്ചെന്നുമാണ് പരാതി.