ഇഷ്ടക്കാരെയും സ്വന്തക്കാരെയും ജോലിയിൽ തിരുകി കയറ്റി...!, കൊല്ലം ജില്ലാ ആശുപത്രി സൂപ്രണ്ട് ഓഫീസിലേക്ക് എസ്.ഡി.പി.ഐ മാർച്ച്‌ നടത്തി

കൊല്ലം : കൊല്ലം ജില്ലാ ആശുപത്രിയിൽ താൽക്കാലിക നിയമനവുമായി ബന്ധപ്പെട്ടുള്ള അഴിമതിക്കും കെടുകാര്യസ്ഥതയ്ക്കമെതിരെ എസ്.ഡി.പി.ഐ ജില്ലാ ആശുപത്രിയിലേക്ക് മാർച്ച്‌ നടത്തി. കൊല്ലം റസ്റ്റ്‌ ഹൗസ് പരിസരത്ത് നിന്നും ആരംഭിച്ച മാർച്ച് ജില്ലാ ആശുപത്രിക്ക്‌ മുന്നിൽ പോലിസ് തടഞ്ഞു. തുടർന്ന് നടന്ന പ്രതിഷേധ യോഗം എസ്.ഡി. പി.ഐ ജില്ലാ പ്രസിഡന്റ്‌ ലത്തീഫ് കരുനാഗപ്പള്ളി ഉദ്ഘാടനം ചെയ്തു. ജില്ലാ ആശുപത്രിയിൽ വൻതോതിലുള്ള  അഴിമതിയും ക്രമക്കേടും ആണ് നടന്നുകൊണ്ടിരിക്കുന്നതെന്ന് അദ്ദേഹം പറഞ്ഞു. 

നിരവധി ജീവനക്കാർ തസ്തികയ്ക്ക് യോഗ്യത ഉള്ളവരല്ലെന്ന് എംപ്ലോയ്മെൻറ് എക്സ്ചേഞ്ചിൽ നിന്നും നടത്തിയ പരിശോധനയിൽ കണ്ടെത്തിയിരുന്നു .  എന്നാൽ, ഹോസ്പിറ്റൽ മാനേജ്മെൻറ് കമ്മിറ്റിയിൽ ഉള്ള വിവിധ രാഷ്ട്രീയ പാർട്ടികൾ കോഴ വാങ്ങിയും തങ്ങളുടെ ഇഷ്ടക്കാരെയും സ്വന്തക്കാരെയും തിരുകി കയറ്റിയും ചട്ടവിരുദ്ധമായ നിയമനങ്ങളിലൂടെ എംപ്ലോയ്മെൻറ് എക്സ്ചേഞ്ചൽ രജിസ്റ്റർ ചെയ്തിട്ടുള്ള തൊഴിൽരഹിതരെ വഞ്ചിക്കുന്ന നിലപാടാണ് സ്വീകരിച്ചിട്ടുള്ളത്. 

ഹോസ്പിറ്റലിലേക്ക് ആവശ്യമായ കിടക്കകൾ, പുതപ്പുകൾ എന്നിവ വാങ്ങിയതിൽ ലക്ഷക്കണക്കിന് രൂപയുടെ ക്രമക്കേട് നടന്നതായി ആരോപണം ഉയർന്നിരുന്നു. ഇതിൻറെ അടിസ്ഥാനത്തിൽ വിജിലൻസ് പ്രാഥമിക അന്വേഷണം നടത്തുകയും ചെയ്തു. ആശുപത്രി കെട്ടിടത്തിന്റെ മെയിൻറനൻസുമായി ബന്ധപ്പെട്ട കാലതാമസം ജനങ്ങൾക്ക് ഏറെ ബുദ്ധിമുട്ടുകൾ സൃഷ്ടിക്കുന്നു. മരുന്നുകളുടെ ദൗർലഭ്യം രോഗികളെ വലയ്ക്കുകയാണ്. ആശുപത്രിയിൽ ചികിത്സ തേടുന്ന പട്ടിണിപ്പാവങ്ങൾ പുറത്തുനിന്നും വൻ വിലയ്ക്ക് മരുന്നുകൾ വാങ്ങേണ്ട അവസ്ഥയിലാണ്.

സാധാരണക്കാരന്റെ ആശ്രയകേന്ദ്രമായ ജില്ലാ ഹോസ്പിറ്റൽ പിൻവാതിൽ നിയമനത്തിന്റെയും അഴിമതിയുടെയും കെടുകാര്യസ്ഥിതിയുടെയും കൂത്തരങ്ങായി മാറിയിരിക്കുന്നുവെന്നും അദ്ദേഹം പറഞ്ഞു. 

ജില്ലാ വൈസ് പ്രസിഡന്റ്‌ എ.കെ ഷരീഫ് അധ്യക്ഷത വഹിച്ചു. ജില്ലാ ജനറൽ സെക്രട്ടറി റിയാസ് കണ്ണനല്ലൂർ,ജില്ലാ സെക്രട്ടറിമാരായ രാഖി അശോഖൻ, നുജുമുദ്ധീൻ അഞ്ചുമുക്ക്,മനാഫ് പത്തടി,ജില്ലാ കമ്മിറ്റി അംഗങ്ങളായ കണ്ണൻ പട്ടത്താനം, വി ഷാഹുൽ ഹമീദ് ,ഹബീബ് കൊല്ലം, സലീന സുധീർ, മണ്ഡലം ഭാരവാഹികളായ ഷഫീക് കരുവ, സുനീർ, ഷെറിൻ, റാസി, സുരാജ് കൊല്ലക എന്നിവർ പങ്കെടുത്തു.