കാഞ്ഞിരംകുഴി സെക്ഷൻ പരിധിയിൽ കനത്ത മഴയിൽ വൈദ്യുതി തടസ്സം; പുനഃസ്ഥാപന പ്രവർത്തനങ്ങൾക്ക് കെഎസ്ഇബി മുൻഗണന, ജനങ്ങൾക്ക് ജാഗ്രതാ മുന്നറിയിപ്പ്

അഞ്ചാലുംമൂട് : കനത്ത മഴയും കാറ്റും മൂലം പ്രദേശത്ത് വ്യാപകമായ നാശനഷ്ടവും വൈദ്യുതി തടസ്സവും ഉണ്ടായതായി റിപ്പോർട്ട്. മുണ്ടക്കൽ പള്ളിക്ക് സമീപം വൈദ്യുതി പോസ്റ്റിന് മുകളിലേക്ക് മരം ചാഞ്ഞതും റിഫാക്ടറിക്ക് സമീപം മറ്റൊരു പോസ്റ്റ് ഒടിഞ്ഞതും ഓലിക്കര ജംഗ്ഷനിലും അഷ്ടമുടി പ്രദേശത്തും മണിക്കൂറുകളോളം വൈദ്യുതി മുടക്കത്തിന് കാരണമായി. തുടർച്ചയായ മഴയും കാറ്റും മൂലം മരങ്ങൾ കടപുഴകി വൈദ്യുതി ലൈനുകൾ റോഡിലേക്ക് വീഴാനുള്ള സാധ്യതയും നിലനിൽക്കുന്നതായി കെ.എസ്.ഇ.ബി കാഞ്ഞിരംകുഴി സെക്ഷൻ ഓവർസീയർ സുനിൽകുമാർ അഷ്ടമുടി ലൈവിനോട്. കെഎസ്ഇബി ജീവനക്കാർ രാത്രി-പകൽ ഭേദമന്യേ നടത്തിയ ശ്രമങ്ങൾക്കൊടുവിൽ പലയിടത്തും വൈദ്യുതി ബന്ധം പുനഃസ്ഥാപിച്ചെങ്കിലും, കാലാവസ്ഥ മോശമായി തുടരുന്നതിനാൽ വീണ്ടും തടസ്സങ്ങൾ ഉണ്ടാകാനുള്ള സാധ്യത അദ്ദേഹം ചൂണ്ടിക്കാട്ടി. പുലർച്ചെ സഞ്ചരിക്കുന്നവർ കർശനമായ ജാഗ്രത പാലിക്കണമെന്നും, വീണുകിടക്കുന്ന വൈദ്യുതി ലൈനുകളിൽ ഒരു കാരണവശാലും സ്പർശിക്കരുതെന്നും അദ്ദേഹം മുന്നറിയിപ്പ് നൽകി. 

വൈദ്യുതി ലൈനുകളിൽ നിന്ന് അകലം പാലിക്കുക : റോഡിൽ വീണുകിടക്കുന്ന ലൈനുകൾ അപകടകരമാണ്, അവയിൽ സ്പർശിക്കുന്നത് ഒഴിവാക്കണം.

പുലർച്ചെ യാത്രയിൽ ജാഗ്രത : മോശം കാലാവസ്ഥയിൽ വൈദ്യുതി ലൈനുകളോ മരങ്ങളോ വീഴാനുള്ള സാധ്യത കൂടുതലാണ് അതിനാൽ പുലർച്ചെയുള്ള യാത്രയിൽ ജാഗ്രത വേണം.

അടിയന്തര സഹായത്തിന് : വൈദ്യുതി അപകടങ്ങൾ ശ്രദ്ധയിൽപ്പെട്ടാൽ ഉടൻ കെഎസ്ഇബി ഉദ്യോഗസ്ഥരെ  വിളിക്കുക.

ഓലിക്കര ജംഗ്ഷനിലും അഷ്ടമുടിയിലും വൈദ്യുതി തടസ്സം മൂലം വ്യാപാര സ്ഥാപനങ്ങളും വീടുകളും ബുദ്ധിമുട്ട് നേരിട്ടു. കെഎസ്ഇബി പ്രദേശത്ത് തുടർച്ചയായ നിരീക്ഷണവും അറ്റകുറ്റപ്പണികളും നടത്തിവരികയാണ്.  കാലാവസ്ഥാ നിരീക്ഷണ കേന്ദ്രം  വരും മണിക്കൂറുകളിലും മഴയും കാറ്റും തുടർന്നേക്കാമെന്നതിനാൽ, ജനങ്ങൾ സുരക്ഷിത സ്ഥലങ്ങളിൽ തുടരാനും ഇത്തരം പ്രദേശങ്ങളിലൂടെയുള്ള അനാവശ്യ യാത്രകൾ ഒഴിവാക്കാനും അധികൃതർ നിർദേശിച്ചു.  കെഎസ്ഇബി ഉദ്യോഗസ്ഥർ 24 മണിക്കൂറും പ്രവർത്തനനിരതമായി ജനങ്ങൾക്ക് സുരക്ഷയും വൈദ്യുതി ലഭ്യതയും ഉറപ്പാക്കാൻ ശ്രമിക്കുന്നതായി അറിയിച്ചു. കൂടുതൽ വിവരങ്ങൾക്കായി കെഎസ്ഇബി ഹെൽപ്പ്‌ലൈനുമായി ബന്ധപ്പെടാവുന്നതാണ്.