കൊല്ലത്ത് ഒൻപത് മാസം ഗർഭിണിയെ തൂങ്ങി മരിച്ച നിലയിൽ കണ്ടെത്തി; മരിച്ചത് 22-കാരിയായ യുവതി

കൊല്ലം : കോട്ടക്കവിളയിൽ ഒൻപത് മാസം ഗർഭിണിയായ യുവതി തൂങ്ങി മരിച്ചു. ഇളമാട് പഞ്ചായത്തിലെ കോട്ടക്കവിള മനു ഭവനിൽ 22-കാരിയായ അശ്വതിയെയാണ് വീടിന്റെ ശുചിമുറിയിൽ തൂങ്ങി മരിച്ച നിലയിൽ കണ്ടെത്തിയത്. 

ഒൻപത് മാസം ഗർഭിണിയായിരുന്ന അശ്വതി, കഴിഞ്ഞ ദിവസം ഭർത്താവിനൊപ്പം ആശുപത്രിയിൽ മെഡിക്കൽ പരിശോധനയ്ക്ക് പോയി മടങ്ങിയെത്തിയ ശേഷം, ഉച്ചയ്ക്ക് 3 മണിയോടെയാണ് മരിച്ച നിലയിൽ കാണപ്പെട്ടത്.

പൂയപ്പള്ളി പോലീസ് അശ്വതിയുടെ ഭർത്താവ് മനുവിനെ ചോദ്യം ചെയ്യലിനായി വിളിച്ചുവരുത്തിയ ശേഷം വിട്ടയച്ചു. മൃതദേഹം പോസ്റ്റ്മോർട്ടത്തിനായി പാരിപ്പള്ളി മെഡിക്കൽ കോളേജിലേക്ക് മാറ്റി. അസ്വാഭാവിക മരണത്തിന് പോലീസ് കേസെടുത്ത് അന്വേഷണം ആരംഭിച്ചു.