ന്യൂഡൽഹി : ഗൂഗിൾ, മെറ്റ, മൈക്രോസോഫ്റ്റ് പോലുള്ള ടെക് ഭീമന്മാർ അവതരിപ്പിക്കുന്ന പുതിയ ആർട്ടിഫിഷ്യൽ ഇന്റലിജൻസ് (എഐ) ഫീച്ചറുകൾ നമ്മുടെ സ്വകാര്യതയ്ക്ക് വലിയ ഭീഷണിയാകുന്നു. നിങ്ങളുടെ ഫോണിലെ വാട്സ്ആപ്പ് സന്ദേശങ്ങളും, ചിത്രങ്ങളും, മറ്റ് സ്വകാര്യ വിവരങ്ങളും നിങ്ങൾ അറിയാതെ തന്നെ എഐ സംവിധാനങ്ങൾ നിരീക്ഷിക്കുന്നുണ്ടാവാം. ഈ വിഷയത്തിൽ ഉപയോക്താക്കൾക്ക് വ്യക്തമായ നിയന്ത്രണം നൽകാത്തത് വലിയ ആശങ്കകൾക്ക് വഴിവെച്ചിരിക്കുകയാണ്.
ഗൂഗിൾ ജെമിനിയും വാട്സ്ആപ്പും
ആൻഡ്രോയിഡ് ഫോണുകളിൽ ഗൂഗിളിന്റെ എഐ ആയ ‘ജെമിനി’ക്ക് ഇപ്പോൾ വാട്സ്ആപ്പ് പോലുള്ള മറ്റ് ആപ്പുകളുമായി സംവദിക്കാൻ കഴിയും. സന്ദേശങ്ങൾ അയക്കാനും, ഫോൺ വിളിക്കാനും ഇത് സഹായിക്കുമെന്നാണ് ഗൂഗിളിന്റെ വാദം. എന്നാൽ, ഗൂഗിൾ അസിസ്റ്റന്റിന്റെ സഹായത്തോടെ ജെമിനി ആവശ്യപ്പെട്ടാൽ, നിങ്ങളുടെ വാട്സ്ആപ്പ് സന്ദേശങ്ങൾ വായിക്കാനും, ചിത്രങ്ങൾ കാണാനും, നോട്ടിഫിക്കേഷനുകൾക്ക് മറുപടി നൽകാനും അതിന് സാങ്കേതികമായി സാധിക്കും. ഈ ഫീച്ചർ പൂർണ്ണമായി പ്രവർത്തനരഹിതമാക്കാൻ വ്യക്തമായ മാർഗ്ഗമില്ല എന്നതാണ് ഏറ്റവും വലിയ അപകടം.
മൈക്രോസോഫ്റ്റിന്റെ ‘റീകോൾ’
മൈക്രോസോഫ്റ്റ് വിൻഡോസ് 11-ൽ അവതരിപ്പിച്ച ‘റീകോൾ’ എന്ന ഫീച്ചറാണ് മറ്റൊരു തലവേദന. കമ്പ്യൂട്ടറിൽ ചെയ്യുന്ന എല്ലാ കാര്യങ്ങളുടെയും സ്ക്രീൻഷോട്ടുകൾ തുടർച്ചയായി എടുത്തുസൂക്ഷിക്കുന്ന ഈ സംവിധാനം, നിങ്ങളുടെ സ്വകാര്യ ചാറ്റുകൾ പോലും വായിക്കാൻ സാധ്യതയുണ്ട്.
മെറ്റയുടെ എഐ സർക്കിൾ
വാട്സ്ആപ്പിൽ മെറ്റ അവതരിപ്പിച്ച നീല എഐ സർക്കിളിനെതിരെയും തുടക്കത്തിൽ വലിയ പ്രതിഷേധം ഉയർന്നിരുന്നു. ചാറ്റുകളിൽ നിന്ന് ഒഴിവാക്കാൻ കഴിയാത്ത ഒരു അതിഥിയെപ്പോലെയാണ് പലർക്കും ഇത് അനുഭവപ്പെട്ടത്.
എന്തുചെയ്യണം?
ടെക് കമ്പനികൾ സൗകര്യത്തിന്റെ പേരിൽ എഐ ഫീച്ചറുകൾ അവതരിപ്പിക്കുമ്പോൾ, ഉപയോക്താവിന്റെ സ്വകാര്യതയാണ് പണയത്തിലാകുന്നത്. ഇതിൽ നിന്ന് രക്ഷ നേടാനുള്ള ഉത്തരവാദിത്തം ഇപ്പോൾ ഉപയോക്താക്കൾക്ക് മാത്രമായിരിക്കുകയാണ്.
ഫോണിലെ സെറ്റിംഗ്സുകളിൽ പോയി ഗൂഗിൾ ജെമിനി പോലുള്ള എഐ സംവിധാനങ്ങൾക്ക് ഏതൊക്കെ ആപ്പുകളിൽ പ്രവേശനാനുമതിയുണ്ടെന്ന് പരിശോധിച്ച് ഉറപ്പുവരുത്തേണ്ടത് അത്യാവശ്യമാണ്. അനാവശ്യമായ അനുമതികൾ ഒഴിവാക്കിയില്ലെങ്കിൽ നിങ്ങളുടെ സ്വകാര്യ വിവരങ്ങൾ നിങ്ങൾപോലുമറിയാതെ ചോർന്നേക്കാം.
.jpg)
