ഇണയെ തേടി മഹാരാഷ്ട്രയിൽ നിന്ന് തെലങ്കാനയിലേക്ക് നദി നീന്തിക്കടന്ന് കടുവ...!, അസാധാരണ നീക്കങ്ങൾ ശ്രദ്ധിച്ച് വനം വകുപ്പ്

മധ്യേന്ത്യയിൽ കടുവകൾക്ക് ഇത് പ്രജനന കാലമാണ്. മിക്ക കാടുകളിലും വനം വകുപ്പ് കടുവകളുടെ അസാധാരണ നീക്കങ്ങൾ ശ്രദ്ധിക്കുന്നതിനിടെ കണ്ടത് പങ്കാളിയെ തേടി മഹാരാഷ്ട്രയിൽ നിന്ന് തെലങ്കാനയിലേക്ക് നീന്തിയെത്തുന്ന ഒരു കടുവയെ. മഹാരാഷ്ട്രയിലെ പ്രാണഹിത നദിയാണ് ഒരു കടുവ നീന്തിക്കടന്നത്.

തെലങ്കാനയിലെ കാഗസ്നഗറിലേക്കാണ് ഈ കടുവ എത്തിയിട്ടുള്ളത്. താൽക്കാലികമായി കാഗസ്നഗറിലെ വന ഇടനാഴിയിൽ ആധിപത്യം സ്ഥാപിക്കാനും ഇണയെ കണ്ടെത്താനുമാണ് ഈ യാത്രയെന്നാണ് വന്യജീവി വിദഗ്ധർ വിശദമാക്കുന്നത്. മഹാരാഷ്ട്രയിലെ ചന്ദ്രപൂർ ജില്ലയിലെ കൻഹർഗാവ് വന്യജീവി സങ്കേതത്തിൽ നിന്ന് കൊമരം ഭീം ആസിഫാബാദ് ജില്ലയിലെ കഗസ്നഗർ ഇടനാഴിയിലേക്ക് കടുവ എത്തിയതായാണ് വിലയിരുത്തപ്പെടുന്നത്. ഒക്ടോബർ മുതൽ ഡിസംബർ വരെയാണ് മധ്യേന്ത്യയിൽ കടുവകളുടെ പ്രജനന കാലം. ഈ കാലയളവിൽ ഇണകളെ തേടി ആൺ കടുവകൾ വലിയ ദൂരങ്ങൾ താണ്ടുന്നത് പതിവാണ്.