​വി.ഡി. സതീശൻ കേരള മുഖ്യമന്ത്രി...!, 11 ദിവസം നീണ്ട അനിശ്ചിതത്വത്തിന് വിരാമം

തിരുവനന്തപുരം : കേരളത്തിന്റെ പതിമൂന്നാമത് മുഖ്യമന്ത്രിയായി വി.ഡി. സതീശനെ ഇന്ത്യൻ നാഷണൽ കോൺഗ്രസ് നേതൃത്വം ഔദ്യോഗികമായി പ്രഖ്യാപിച്ചു. നിയമസഭാ തിരഞ്ഞെടുപ്പിലെ യു.ഡി.എഫിന്റെ ഉജ്ജ്വല വിജയത്തിന് പിന്നാലെ മുഖ്യമന്ത്രിയെ നിശ്ചയിക്കാൻ ഡൽഹിയിൽ നടന്ന തിരക്കിട്ട കൂടിയാലോചനകൾക്കൊടുവിലാണ് പ്രഖ്യാപനം ഉണ്ടായത്. എ.ഐ.സി.സി അധ്യക്ഷൻ മല്ലികാർജുൻ ഖാർഗെയുടെ അനുമതിയോടെ കേരളത്തിന്റെ ചുമതലയുള്ള ദീപാ ദാസ് മുൻഷി അയച്ച പ്രത്യേക നിരീക്ഷകർ എന്നിവർ പങ്കെടുത്ത ഡൽഹിയിൽ നടന്ന പത്രസമ്മേളനത്തിലാണ് സതീശനെ നേതാവായി പ്രഖ്യാപിച്ചത്. തിരഞ്ഞെടുപ്പ് ഫലം വന്ന് 11 ദിവസം നീണ്ടുനിന്ന നാടകീയ ചർച്ചകൾക്കാണ് ഇതോടെ ശുഭപര്യവസാനമായത്.

തുടർച്ചയായി ആറാം തവണയും പറവൂർ മണ്ഡലത്തിൽ നിന്ന് നിയമസഭയിലെത്തുന്ന വി.ഡി. സതീശൻ, കഴിഞ്ഞ അഞ്ച് വർഷം പ്രതിപക്ഷ നേതാവെന്ന നിലയിൽ നടത്തിയ മികച്ച പ്രകടനമാണ് മുഖ്യമന്ത്രി സ്ഥാനത്തേക്ക് അദ്ദേഹത്തിന് വഴിതുറന്നത്. കെ.എസ്.യു കാലഘട്ടം മുതൽക്കേ രാഷ്ട്രീയത്തിൽ സജീവമായ അദ്ദേഹം സംഘടനയുടെ സംസ്ഥാന അധ്യക്ഷനായും എൻ.എസ്.യു.ഐ ദേശീയ ഭാരവാഹിയായും പ്രവർത്തിച്ചിട്ടുണ്ട്. മികച്ച വാഗ്മിയും പാർലമെന്റേറിയനുമായ സതീശൻ തൃശൂർ, തിരുവനന്തപുരം ലോ കോളേജുകളിൽ നിന്നായി നിയമബിരുദവും ബിരുദാനന്തര ബിരുദവും കരസ്ഥമാക്കി. 2001-ൽ ആദ്യമായി നിയമസഭയിലെത്തിയ അദ്ദേഹം അഞ്ചാം തവണയും പറവൂരിൽ വൻ ഭൂരിപക്ഷം നേടിയാണ് സഭയിലെത്തിയത്.

എം.എൽ.എമാരുടെ വികാരം മാനിച്ചും ഗ്രൂപ്പ് സമവാക്യങ്ങൾക്ക് അതീതമായി പുതിയൊരു കേരളത്തെ നയിക്കാൻ സതീശൻ പ്രാപ്തനാണെന്ന കേന്ദ്ര നേതൃത്വത്തിന്റെ വിലയിരുത്തലുമാണ് ഈ തെരഞ്ഞെടുപ്പിൽ നിർണ്ണായകമായത്. മുൻ മുഖ്യമന്ത്രിമാരായ ഉമ്മൻ ചാണ്ടി, എ.കെ. ആന്റണി എന്നിവർക്ക് ശേഷം കോൺഗ്രസ് പ്രസ്ഥാനത്തെ സംസ്ഥാനത്ത് നയിക്കാൻ സതീശൻ നിയോഗിക്കപ്പെടുമ്പോൾ വലിയ പ്രതീക്ഷയിലാണ് അണികളും പൊതുജനങ്ങളും. സംസ്ഥാനം നേരിടുന്ന സാമ്പത്തിക പ്രതിസന്ധികൾ ഉൾപ്പെടെയുള്ള വെല്ലുവിളികൾ ഏറ്റെടുക്കാൻ താൻ സജ്ജനാണെന്ന് പ്രഖ്യാപനത്തിന് പിന്നാലെ അദ്ദേഹം വ്യക്തമാക്കി.