സംഘര്‍ഷം വിട്ടൊഴിയാതെ മണിപ്പുർ...!, മൂന്ന് യുവാക്കളെ തട്ടിക്കൊണ്ടുപോയതായി റിപ്പോർട്ട്, ഒരാളെ സൈന്യത്തിന്റെ സഹായത്തോടെ കണ്ടെത്തി

ഇംഫാല്‍ : സംഘര്‍ഷാവസ്ഥ തുടരുന്ന മണിപ്പുരില്‍ മൂന്ന് യുവാക്കളെ തട്ടിക്കൊണ്ടുപോയി. ഇവരെ കുക്കി വിഭാഗക്കാര്‍ തട്ടിക്കൊണ്ടുപോയെന്നാണ് റിപ്പോര്‍ട്ട്. ഇതില്‍ ഒരാളെ സൈന്യത്തിന്റെ സഹായത്തോടെ പൊലീസ് കണ്ടെത്തി. കാങ്പോക്പി മേഖലയില്‍ നിന്നാണ് ഒരാളെ കണ്ടെത്തിയത്. ജോണ്‍സണ്‍ സിങ്ങിനെയാണ് രക്ഷപ്പെടുത്തിയത്.

കാണാതായ മറ്റ് രണ്ട് പേരെക്കുറിച്ച് വിവരമില്ല. ഇവരുമായുള്ള ഫോണ്‍ബന്ധവും നിശ്ചലമാണ്. അവസാനമായി ഇവരുടെ ഫോണ്‍ സിഗ്‌നല്‍ ലഭിച്ചത് കങ്ലടോങ്ബി മേഖലയില്‍ നിന്നാണ്. തൊയ്തോയ്ബ സിങ്, തൊയ്തൊയ് സിങ് എന്നിവരെയാണ് കണ്ടെത്താനുള്ളത്. തൗബല്‍ ജില്ലയില്‍ നിന്നുള്ള ഇവര്‍ മെയ്തി വിഭാഗത്തില്‍പ്പെട്ടവരാണെന്നാണ് വിവരം.

സ്റ്റാഫ് സെലക്ഷന്‍ കമ്മിഷന്റെ പരീക്ഷയ്ക്ക് എത്തിയവരായിരുന്നു ഇവര്‍. സ്ഥിതിഗതികള്‍ ചര്‍ച്ചചെയ്യാനും തട്ടിക്കൊണ്ടുപോയവരെ രക്ഷപ്പെടുത്താനും ഭരണ-പ്രതിപക്ഷ അംഗങ്ങളുമായി കൂടിക്കാഴ്ച നടത്തിയതായി മുഖ്യമന്ത്രി എന്‍. ബിരേന്‍ സിങ് പറഞ്ഞു. ഇവരെ രക്ഷപ്പെടുത്താന്‍ സര്‍ക്കാര്‍ സംയുക്ത ആക്ഷന്‍കമ്മിറ്റി രൂപവത്കരിച്ചു.

കഴിഞ്ഞ ദിവസം മണിപ്പുരില്‍ വെടിവെപ്പുണ്ടായിരുന്നു. ജിറിബാം ജില്ലയില്‍ മെയ്തി വിഭാഗങ്ങള്‍ താമസിക്കുന്ന മോങ്ബങ് പ്രദേശത്തേക്ക് വനത്തില്‍ നിന്ന് സായുധ സംഘം വെടിവെക്കുകയായിരുന്നു.