കൊല്ലം സ്വദേശിയായ പൊലീസ് ഉദ്യോഗസ്ഥന്റെ മരണം: സമഗ്ര അന്വേഷണം വേണമെന്ന് പി.സി. വിഷ്ണുനാഥ് എം.എൽ.എയുടെ കത്ത്

കൊല്ലം : കുണ്ടറ കാഞ്ഞിരകോട് തെങ്ങുവിള വീട്ടിൽ ജെയ്സൺ അലക്സിന്റെ (സിഐ, പൊലീസ് ടെലികമ്മ്യൂണിക്കേഷൻ വിഭാഗം, തിരുവനന്തപുരം) മരണവുമായി ബന്ധപ്പെട്ട് സമഗ്രമായ അന്വേഷണം ആവശ്യപ്പെട്ട് പി.സി. വിഷ്ണുനാഥ് എം.എൽ.എ മുഖ്യമന്ത്രി പിണറായി വിജയന് കത്ത് നൽകി. കഴിഞ്ഞ ദിവസം ജെയ്സൺ അലക്സിനെ വീട്ടിൽ ജീവനൊടുക്കിയ നിലയിൽ കണ്ടെത്തിയിരുന്നു.

ജെയ്സന്റെ മാതാവ് ജമ്മ അലക്സാണ്ടർ ഉന്നയിച്ച ആരോപണങ്ങൾ ഗൗരവമായി കാണണമെന്ന് എം.എൽ.എ കത്തിൽ ആവശ്യപ്പെട്ടു. ഉദ്യോഗതലത്തിലെ ചില ക്രമക്കേടുകളുടെ ഉത്തരവാദിത്തം ജെയ്സന്റെ മേൽ കെട്ടിവയ്ക്കാൻ ശ്രമിച്ചതിന്റെ ഭാഗമായുള്ള മേലുദ്യോഗസ്ഥരുടെ സമ്മർദ്ദമാണ് മരണത്തിലേക്ക് നയിച്ചതെന്നാണ് ജമ്മ അലക്സാണ്ടറിന്റെ ആരോപണം.

“ജെയ്സന്റെ മരണത്തിനു പിന്നിലെ യഥാർത്ഥ കാരണങ്ങൾ കണ്ടെത്തണം. ഉദ്യോഗസ്ഥന്റെ മാനസിക സമ്മർദ്ദത്തിന് ഇടയാക്കിയ സാഹചര്യങ്ങൾ, ക്രമക്കേടുകളെക്കുറിച്ചുള്ള ആരോപണങ്ങൾ എന്നിവ വിശദമായി അന്വേഷിക്കണം,” എന്ന് പി.സി. വിഷ്ണുനാഥ് കത്തിൽ വ്യക്തമാക്കി.

ഈ ആരോപണങ്ങൾ പൊലീസ് വിഭാഗത്തിന്റെ പ്രവർത്തനത്തിൽ സുതാര്യതയും ഉത്തരവാദിത്തവും ഉറപ്പാക്കേണ്ടതിന്റെ ആവശ്യകതയിലേക്ക് വിരൽ ചൂണ്ടുന്നു. ജെയ്സന്റെ മരണം നാട്ടിൽ വലിയ ഞെട്ടലുണ്ടാക്കിയിട്ടുണ്ട്. അന്വേഷണത്തിന്റെ പുരോഗതി സംബന്ധിച്ച് കൂടുതൽ വിവരങ്ങൾക്കായി നാട്ടുകാർ കാത്തിരിക്കുകയാണ്.