തൃക്കരുവയിൽ എൽഡിഎഫിന് തുടക്കം തന്നെ തിരിച്ചടി...!, സിപിഐ നേതാവ് അജ്മീൻ നടുവിലച്ചേരി വാർഡിൽ സ്വതന്ത്രനായി മത്സരിക്കും; ടെലിവിഷൻ അടയാളത്തിൽ ജനവിധി തേടുന്നത് സിപിഐയുടെ തൃക്കരുവയിലെ മുഖം; നിലവിലെ എൽഡിഎഫ് സ്ഥാനാർത്ഥി മുരളി നാരായണൻ നേരത്തെ സമാന സംഭവത്തിൽ പാർട്ടി നടപടി നേരിട്ടയാൾ; മുതലാക്കാൻ എൻഡിഎയും യുഡിഎഫും

അഞ്ചാലുംമൂട് : തൃക്കരുവ ഗ്രാമപഞ്ചായത്തിലെ നടുവിലച്ചേരി വാർഡിൽ എൽഡിഎഫിനുള്ളിൽ പ്രതിസന്ധി സൃഷ്ടിച്ച് ഘടകക്ഷിയായ സിപിഐ നേതാവിന്റെ സ്വതന്ത്ര സ്ഥാനാർത്ഥിത്വം. മുന്നണിയുടെ ഔദ്യോഗിക സ്ഥാനാർഥിക്കെതിരെ സഖ്യകക്ഷിയായ സിപിഐയുടെ പ്രമുഖ പ്രാദേശിക നേതാവ് തന്നെ സ്വതന്ത്രനായി മത്സരരംഗത്തിറങ്ങിയതോടെ ഇടതുമുന്നണിയിൽ കലാപക്കൊടി ഉയർന്നു. 

സിപിഎം പ്രതിനിധിയായ എൽഡിഎഫ് ഔദ്യോഗിക സ്ഥാനാർഥി മുരളി നാരായണനെതിരെ സിപിഐ ജില്ലാ നേതാവും നിലവിൽ തൃക്കരുവ പഞ്ചായത്ത് വികസനകാര്യ സ്റ്റാൻഡിങ് കമ്മിറ്റി ചെയർമാനുമായ അജ്മീൻ എം. കരുവയാണ് സ്വതന്ത്ര ചിഹ്നത്തിൽ ജനവിധി തേടുന്നത്. 46 കാരനായ അജ്മീൻ മുൻ AIYF സംസ്ഥാന കൗൺസിൽ അംഗം കൂടിയാണ്.

കഴിഞ്ഞ തവണ 16 വാർഡുകളുള്ളപ്പോൾ സിപിഐക്ക് നാല് സീറ്റ് മാത്രമാണ് ലഭിച്ചത്. വാർഡുകൾ 18 ആയിട്ടും സിപിഎം അതേ നിലപാട് ആവർത്തിക്കാൻ സിപിഎം ശ്രമിച്ചതായി ആരോപണമുണ്ട്. എന്നാൽ സിപിഐ സിപിഎം തർക്കം തൃക്കരുവയിൽ ഇല്ലെന്ന് നേതാക്കൾ പറയുന്നു. സീറ്റ് വിഭജനത്തിൽ എതിരഭിപ്രായമില്ലെന്നാണ് നേതാക്കളുടെ വാദം.

നാമനിർദേശ പത്രിക പിൻവലിക്കാൻ സിപിഐ നേതൃത്വം ശക്തമായ സമ്മർദം ചെലുത്തിയെങ്കിലും അജ്മീൻ ഉറച്ചുനില്ക്കുകയായിരുന്നു. അതേസമയം, എൽഡിഎഫ് ഔദ്യോഗിക സ്ഥാനാർഥി മുരളി നാരായണനും നേരത്തെ സ്വതന്ത്രനായി മത്സരിച്ച് പാർട്ടി നടപടി നേരിട്ട വ്യക്തിയാണ്. മുൻ എൽഡിഎഫ് ഭരണസമിതിയിലെ പഞ്ചായത്ത് പ്രസിഡൻറ് ആയിരുന്നു എൽഡിഎഫ് സ്ഥാനാർത്ഥി. അന്നത്തെ സ്വീകാര്യത വോട്ടാക്കി മാറ്റാമെന്നാണ് എൽഡിഎഫിന്റെ പ്രതീക്ഷ. വിമത ശബ്ദമുയർത്തിയ അജ്മീനെ സിപിഐ പ്രാഥമിക അംഗത്വത്തിൽനിന്ന് പുറത്താക്കിയതായി പാർട്ടി മണ്ഡലം കമ്മിറ്റി വാർത്താക്കുറിപ്പിലൂടെ അറിയിച്ചു. 

കഴിഞ്ഞ തെരഞ്ഞെടുപ്പിൽ ഈ വാർഡിൽ യുഡിഎഫിന്റെ സലീന ഷാഹുൽ എൽഡിഎഫ് സ്ഥാനാർഥി ബീനയെ 67 വോട്ടിന് പരാജയപ്പെടുത്തിയിരുന്നു. അന്ന് എൻഡിഎ മത്സരിച്ചിരുന്നില്ല. മൂന്നാം സ്ഥാനക്കാരനായ എസ്ഡിപിഐ സ്ഥാനാർഥി 146 വോട്ട് നേടിയത് ശ്രദ്ധേയമായിരുന്നു.

വാർഡ് പുനർനിർണയത്തെ തുടർന്ന് ചെറിയ ജനസംഖ്യാ–സാമുദായിക മാറ്റമുണ്ടെങ്കിലും എൽഡിഎഫിന് അനുകൂല അന്തരീക്ഷമാണെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. എന്നാൽ ഇടതുമുന്നണിയിലെ തമ്മിലടി യുഡിഎഫിന് മുതലാകുമെന്ന് നിരീക്ഷകർ ചൂണ്ടിക്കാട്ടുന്നു. ഇത്തവണ എൻഡിഎയും എസ്ഡിപിഐയും മത്സരരംഗത്തുള്ളതും ഇരുമുന്നണികൾക്കും തലവേദന സൃഷ്ടിക്കുന്നു.

തൃക്കരുവ പഞ്ചായത്തിൽ കഴിഞ്ഞ തവണ എൽഡിഎഫും യുഡിഎഫും ഏഴ് വാർഡ് വീതം നേടി സമമായിരുന്നു. ബാക്കി രണ്ടും ബിജെപി പിടിച്ചു. നറുക്കെടുപ്പിൽ ഭാഗ്യം യുഡിഎഫിനൊപ്പം നിന്നതോടെ പ്രസിഡന്റ് സ്ഥാനവും ഭരണവും യുഡിഎഫിന് ലഭിച്ചു. വികസന–ക്ഷേമ സ്ഥിരം സമിതികൾ എൽഡിഎഫിനായിരുന്നു. ഇപ്പോൾ 18 വാർഡുകളായതോടെ ഭരണം ആർക്കെന്നത് കൂടുതൽ നിർണായകമായിരിക്കുകയാണ്.