വിവാഹ വാർഷികാഘോഷത്തിനിടെ മദ്യപാനവും വാക്കു തർക്കവും...!, ഇടപെട്ട അച്ഛനെ മകൻ കസേരയ്ക്ക് അടിച്ചു കൊലപ്പെടുത്തി

തിരുവനന്തപുരം : അമ്പൂരിയിൽ മകൻ അച്ഛനെ കസേരയ്ക്ക് അടിച്ചു കൊലപ്പെടുത്തി. ബുധനാഴ്ച രാത്രിയിലായിരുന്നു സംഭവം. കുരുവിക്കോണം സ്വദേശി തോമസ് എബ്രഹാം (62) ആണ് കൊല്ലപ്പെട്ടത്. കൊലപാതകത്തിൽ മകൻ ഷാനുവിനെ വെള്ളറട പൊലീസ് കസ്റ്റഡിയിലെടുത്തു. സംഘർഷത്തിനിടെ കുത്തേറ്റ അമ്മാവൻ വർഗീസിനെ ആശുപത്രിയിൽ പ്രവേശിപ്പിച്ചിരിക്കുകയാണ്.

ഷാനുവിന്‍റെ വിവാഹ വാർഷിക ആഘോഷത്തിനിടെയാണ് സംഘർഷം. ആഘോഷത്തിന്റെ ഭാഗമായി മദ്യപാനമുണ്ടായിരുന്നു. മദ്യലഹരിയിൽ ഷാനു ഭാര്യയുമായി വാക്കേറ്റമുണ്ടായി. ഷാനുവിന്‍റെ അമ്മയും അമ്മാവനും ചേർന്ന് ഇരുവരെയും നിയന്ത്രിക്കാൻ ശ്രമിച്ചു. ഇതിനിടെയാണ് ഷാനു വർഗീസിനെ കത്തി ഉപയോഗിച്ചു കുത്തിയത്.

ബഹളം കേട്ടാണ് തോമസ് എബ്രഹാം ഇവിടേക്ക് എത്തുന്നത്. ഷാനുവിനെ പിടിച്ചു മാറ്റാൻ അദ്ദേഹം ശ്രമിച്ചു. അപ്പോഴാണ് ഷാനു കസേരയെടുത്ത് പിതാവിന്റെ തലയ്ക്കടിച്ച് വീഴ്ത്തുന്നത്. തോമസിനെ ഉടൻ തൊട്ടടുത്ത സ്വകാര്യ ആശുപത്രിയിലെത്തിച്ചെങ്കിലും മരണം സംഭവിച്ചു. മൃതദേഹം കാരക്കോണം ആശുപത്രിയിലേക്ക് മാറ്റിയിരിക്കുകയാണ്.