‘പ്രതീക്ഷിച്ച വിജയം കൈവരിക്കാനായില്ല; കേരളത്തിലെ തന്റെ ദൗത്യം പൂർത്തിയായിട്ടില്ല’; ബിജെപിയെ ഭരണത്തിൽ എത്തിക്കുമെന്ന് രാജീവ് ചന്ദ്രശേഖർ

തിരുവനന്തപുരം : കേരളത്തിൽ ബിജെപിയെ ഭരണത്തിലേറ്റുകയെന്ന ലക്ഷ്യം പൂർത്തിയായിട്ടില്ലെന്നും ആ ദൗത്യം തുടരുമെന്നും ബിജെപി നേതാവ് രാജീവ് ചന്ദ്രശേഖർ. നിയമസഭാ തെരഞ്ഞെടുപ്പിൽ പ്രതീക്ഷിച്ച വിജയം കൈവരിക്കാനായില്ലെന്ന് സമ്മതിച്ച അദ്ദേഹം, സംസ്ഥാനത്ത് പ്രകടമായത് ശക്തമായ സിപിഎം വിരുദ്ധ തരംഗമാണെന്ന് ഒരു മലയാളം മാധ്യമത്തിന് നൽകിയ അഭിമുഖത്തിൽ പറഞ്ഞു.

പത്തോളം സീറ്റുകൾ പ്രതീക്ഷിച്ചിരുന്നതായും തിരുവനന്തപുരത്തെ മണ്ഡലങ്ങളിലും നേമത്തും വിജയം ഉറപ്പിച്ചിരുന്നതായും അദ്ദേഹം വ്യക്തമാക്കി. എന്നാൽ ന്യൂനപക്ഷ ഏകീകരണവും എഫ്സിആർഎ വിഷയത്തിലുണ്ടായ പ്രചാരണങ്ങളും പാർട്ടിക്ക് തിരിച്ചടിയായി. ഈ പ്രചാരണം പ്രതിരോധിക്കുന്നതിൽ പരാജയപ്പെട്ടത് തിരുവല്ല, പാലാ തുടങ്ങിയ മണ്ഡലങ്ങളിലെ സാധ്യതകളെ ബാധിച്ചു. മുന്നണി പരീക്ഷണങ്ങൾ തുടരുമെന്നും വരും ദിവസങ്ങളിൽ കൂടുതൽ പാർട്ടികൾ എൻഡിഎയുടെ ഭാഗമാകുമെന്നും അദ്ദേഹം കൂട്ടിച്ചേർത്തു. വോട്ട് വിഹിതത്തിലുണ്ടായ കുറവ് ഗൗരവമായി പരിശോധിക്കുമെന്നും രാജീവ് ചന്ദ്രശേഖർ വ്യക്തമാക്കി.