കൊല്ലത്ത് ടെക്സ്റ്റൈൽ ഷോപ്പ് ഉടമയും മാനേജരും തൂങ്ങി മരിച്ച സംഭവം...!, സാമ്പത്തിക പ്രശ്നങ്ങളും അടുപ്പവും കാരണമായെന്ന് പോലീസ്

കൊല്ലം : ആയൂർ ടൗണിലെ ലാവിഷ് ടെക്സ്റ്റൈൽസ് വസ്ത്രവ്യാപാര ശാലയുടെ ഉടമ മലപ്പുറം കരിപ്പൂർ സ്വദേശി അലി (35)യും മാനേജർ ചടയമംഗലം പള്ളിക്കൽ സ്വദേശിനി ദിവ്യാമോൾ (40)യും വെള്ളിയാഴ്ച രാവിലെ കടയുടെ താഴത്തെ നിലയിലെ വിശ്രമമുറിയിൽ തൂങ്ങി മരിച്ച നിലയിൽ കണ്ടെത്തിയ സംഭവത്തിൽ പോലീസ് അന്വേഷണം തുടരുന്നു. പോസ്റ്റ്‌മോർട്ടം റിപ്പോർട്ട് ഇരുവരും ആത്മഹത്യ ചെയ്തതാണെന്ന് സ്ഥിരീകരിച്ചെങ്കിലും, മരണത്തിനു പിന്നിലെ കാരണങ്ങൾ വ്യക്തമാക്കാൻ ചടയമംഗലം സിഐ എൻ. സുനീഷിന്റെ നേതൃത്വത്തിൽ അന്വേഷണം നടക്കുകയാണ്.

പോലീസിന്റെ പ്രാഥമിക അന്വേഷണത്തിൽ, അലിയും ദിവ്യാമോളും തമ്മിലുള്ള അടുപ്പവും കടയുടെ സാമ്പത്തിക ഇടപാടുകളുമായി ബന്ധപ്പെട്ട പ്രശ്നങ്ങളാണ് ആത്മഹത്യയ്ക്ക് കാരണമായതെന്ന് സൂചന. അലി ഒരാഴ്ച മുമ്പ് കൊട്ടാരക്കരയിലെ ഒരു ബാങ്കിൽ നിന്ന് 4 ലക്ഷം രൂപ വായ്പ എടുത്തിരുന്നു. എന്നാൽ, ഈ തുക എവിടെ പോയെന്നതിന് വ്യക്തമായ ഉത്തരം ലഭിച്ചിട്ടില്ല. ദിവ്യാമോൾ, ഫർണിച്ചർ കടയിൽ സെയിൽസ് ഗേൾ ആയി ജോലി ചെയ്തിരുന്ന ശേഷം അലിയുടെ വസ്ത്രവ്യാപാര ശാലയിൽ മാനേജരായി. ഇവർ തമ്മിലുള്ള അടുപ്പം പിന്നീട് സാമ്പത്തിക ഇടപാടുകളിലേക്കും വ്യാപിച്ചതായി പോലീസ് പറയുന്നു.

ദിവ്യാമോൾ അടുത്തിടെ പുതിയ വീടിന്റെ നിർമാണം ആരംഭിച്ചിരുന്നു, ഇത് കോൺക്രീറ്റ് ഘട്ടത്തിൽ എത്തിയിരുന്നു. എന്നാൽ, കടയുടെ വരവ്-ചെലവ് കണക്കുകളിൽ ഉണ്ടായ പ്രശ്നങ്ങൾ ഇരുവർക്കുമിടയിൽ സംഘർഷത്തിന് കാരണമായെന്നാണ് പോലീസിന്റെ നിഗമനം. ദിവ്യാമോളുടെ ഭർത്താവ് രാജീവിനെ മൊഴിയെടുക്കാൻ തിങ്കളാഴ്ച ചടയമംഗലം പോലീസ് സ്റ്റേഷനിലേക്ക് വിളിപ്പിച്ചിട്ടുണ്ട്.

അന്വേഷണ ഉദ്യോഗസ്ഥർ പറയുന്നതനുസരിച്ച്, കടയുടെ സാമ്പത്തിക ബുദ്ധിമുട്ടുകളും ഇരുവർ തമ്മിലുള്ള വ്യക്തിപരമായ ബന്ധവും ആത്മഹത്യ എന്ന തീരുമാനത്തിലേക്ക് നയിച്ചിരിക്കാം. കേസിൽ കൂടുതൽ വിശദാംശങ്ങൾ ശേഖരിക്കുന്നതിനായി പോലീസ് അന്വേഷണം തുടരുകയാണ്.